Ayera mainta durante conferencia di prensa Minister di Salud Publico y Turismo, Sr. Dangui Oduber, a elabora ariba e situacion actual cu e variante omicron, e programa di vacunacion di ‘booster shot’, e problematica di testmento y tambe a menciona e posibilidad cu e pandemia di COVID-19 lo bira un epidemia y ki plan Gobierno ta trahando ariba dje pa mehora e manera di biba mas liber na Aruba. 

Minister Oduber a splica cu Gobierno y su Ministerio  ta monitorea tur siman, tur dia e cantidad di casonan, hospitalisacion , capacidad cu tin den ICU, e situacion cu tin cu e personal na  hospital y a base di esey nan ta tuma decisionnan mas responsabel posibel teniendo cuenta cu e balanse entre salud y economia

El subraya cu apesar cu Aruba tin  riba tres mil caso activo di COVID-19 e situacion na hospital ta bao di control. A tuma nota si cu tin un aumento den e cantidad di admision den e ultimo dianan, pero segun el a señala si compara e variante omicron cu e variante delta e admision na hospital ta hopi mas slow.

Manera ta conoci caba tin varios estudio, varios investigacion cu a wordo haci rond mundo ariba con contagioso e variante omicron ta, con peligroso e ta y Minister ta indcia cu den tur e estudionan cu a wordo haci e resultado ta cu en berdad omicron ta hopi mas contagioso, pero e ta menos peligroso si compara esaki cu variante delta.

Nos por mira esaki na Aruba tambe den e admisionnan y tambe e estado fisico cu pashentnan ta wordo admiti na hospital ta diferente compara cu e variante delta. Esaki ta duna nos un perspectiva un tiki mas positivo mirando e cantidad halto di casonan cu tin na Aruba. Nos a surpasa tres mil caso algo cu nunca nos a pensa nos lo yega. Pero esaki no ta solamente na Aruba, nos ta wak esaki na Corsou, nos ta wak esaki na Boneiro, nos ta wak e na Hulanda y rond mundo e paisnan ta experenciando e mesun tendencia aki pasobra simplemente e variante aki ta hopi mas contagioso”, el a agrega.

Dia 26 di november 2021 DVG a cuminsa cu e programa di ‘booster shot’ pa tur persona riba 60 aña di edad poco poco e edad pa ricibi e ‘booster shot’ bahando y na e momento aki vacunacion ta tumando luga pa tur persona riba 40 aña. Minister Oduber ta splica cu e personanan cu ta desea di ricibi nan ‘booster shot’ por bay na tur momento entre 8or di mainta y 3or di atardi na Centro Libertador Betico Croes.

El a indica cu entrante otro siman e intencion ta pa adapta e orario pa ricibi vacuna di 8or di mainta te cu 8or di anochi. El a bisa tambe cu nan tin intencion pa e bus cu ta suministra entre 200 y 300 vacuna pa dia cuminsa drenta den diferente bario na Aruba cuminsando na San Nicolas entrante dialuna 10 di januari y despues e lo pasa den diferente bario pa stimula mas hende pa tuma e ‘booster shot’.

Segun el a informa te cu ayera un total di 14.316 persona a tuma nan ‘booster shot’. “Nos ta keda recomenda y stimula tur hende pa tuma e booster shot pasobra simplemente e vacuna a duna e resultado cu nos tabata busca den comienso y nos por prueba esey cu e datonan cu hospital mes ta comparti cu nos”, el a agrega.

Aruba ta den e di cinco ola di COVID-19 y cada bes ta bin diferente variante. Minister Oduber ta remarca cu como pais Aruba tin cu cuminsa prepara, adapta y siña biba cu e virus pasobra muy probablemente, segun el a informa, e virus aki no lo stop di existi y enbes di keda un pandemia e lo bira un epidemia. El a informa cu Gobierno di Aruba y Departamento di Salud Publico a cuminsa prepara un plan pa yuda adpata y pa siña biba mas liber, biba sin restriccion y sin medida. “Mi ta kere ta necesario pa nos por sigui pa dilanti y hiba un bida liber”, el a indica.

El a splica cu locual nan ta pensando ta pa amplia e capacidad di ICU pa tin mas cama disponibel pa tin mas personal disponibel y amplia tambe e capacidad den e departamento di covid.  Minister a sigui splica cu e fondonan pa por realisa e ampliacionan aki lo bin di entradanan cu hospital tin na e momentonan aki, ya cu hospital ta encarga cu e testmento di tur e local nan y esaki, Minister ta señala a genera suficiente entrada den e ultimo lunanan aki pa por inverti back den ampliacion di capacidad di ICU y tambe den e departamento di covid. Den e ultimo dianan por a tuma nota di e rijnan sumamente largo pa test.

Den un conferencia di prensa anterior, Minister Oduber a menciona cu tin e impresion cu literalmente tur hende na Aruba kier haci un test. “E intencion di e test semper tabata pa mitiga e plamamento, mitiga e contagio, evita cu mas hende ta haya covid. Pero considerando e hecho cu na Aruba ya caba nos  surpasa tres mil caso activo, nos ta mira cu e positivity rate ya caba ta riba 70% nos por conclui cu e ta e ta plama caba, kiermen cada bes nos mester puntra nos mes, hunto cu e gele cluster si tin sentido pa continua sigui test na e forma cu nos ta haciendo”, el a agrega.

El a enfatisa cu e ta un situacion cu no ta andando solamente na Aruba, pero na otro paisnan di mundo tambe e situacion ta andando y expertonan ta debatiendo si tin e necesidad pa sigui test di e forma aki of ta bay over na un otro sistema pa test e gruponan di risico, e gruponan vulnerabel si. “Ta decisionnan cu nos tin cu bay tuma den e proximo simannan nos dilanti pa wak kico ta bira nos maneho referente test pasobra manera mi a bisa e ta costa hopi placa y e no a duna e resultado cu nos tabata buscando manera nos a haci durante e prome cuater olanan”, Minister a indica.

Por ultimo Minister Oduber a enfatisa cu ya caba Gobierno di Aruba y Departamento di Salud Publico ta preparando  pa haci adaptacionnan pa tur hende por siña biba cu e virus pasobra mundo ta cayendo den e mesun ciclo cu di e ultimo dos añanan, “un ciclo caminda mundo ta secuestra, Aruba ta secuestra y mirando cu e variante aki ta menos peligroso poco poco nos por cuminsa pensa riba hiba un bida mas normal back”.