ORANJESTAD – Diamars atardi Minister di Turismo, Salubridad Publico y Deporte- sr. Dangui Oduber, tabata den un conferencia di prensa hunto cu e directora di IBiSA- sra. Monique Van Embden, Edgard Erasmus y William Erasmus di IBiSA di parti deporte escolar.
Den e conferencia aki, e mandatario a anuncia cu dia 24 di mei binidero lo ta e apertura oficial di Olimpiada Escolar, na stadion Guillermo Prospero Trinidad na Dakota pa 5or di atardi. E Olimpiada Escolar lo tin un duracion di 3 siman, y ta conta cu casi 2,000 alumno cu ta participa na dje, di 62 scol. “E ta algo bunita ora bo ta wak scolnan y alumnonan competi contra otro den deporte”, e mandatario a expresa. For di aña pasa caba, e scolnan di nivel Preparatorio, Basico y Avansa a cuminsa cu e fase di clasificacion pa e Olimpiada Escolar. Oduber a splica cu e apertura di e Olimpiada Escolar ta e final di tur e disciplina di deporte, pasobra e clasificacionnan a cuminsa caba desde di aña pasa.
Olimpiada Escolar a inicia na aña 2002 bou maneho di ex Minister di Deporte, sr. Ramon Lee. Na aña 2010, esaki a wordo para pa Gabinete Mike Eman 1, y awor despues di mas di 8 aña, Oduber ta rebiba esaki bek na bienestar di nos muchanan. Segun un comunicado di prensa, mandatario a trece dilanti cu na momento cu su persona a drenta gobierno, e la pone den su maneho pa cuminsa bek cu e Olimpiada Escolar. “Esaki ta parti di nos vision pa stimula deporte, stimula nos muchanan pa haci deporte y participa activamente, y olimpiada escolar ta algo instrumental den e vision aki” asina e minister a expresa. Pa tur cos cana manera cu mester tam gobierno a dicidi di instala un comision special pa organisa e Olimpiada Escolar.
Finalmentem e mandatario a gradici IBiSA pa organisa y planea e Olimpiada Escolar, e la gradici tambe trahadonan di Ministerio di Turismo, Salubridad Publico y Deporte, como tambe Departamento di Cultura, cu lo bay yuda den e parti apertura oficial.
Oduber a expresa cu e ta sumamente contento cu e re-apertura di Olimpiada Escolar, cu ta algo bunita caminda gobierno ta mustra cu e tin deporte na pecho y ta trece participacion activo di nos muchanan den deporte.
