Dialuna atardi, Minister di Turismo Sr. Dangui Oduber a haci un bishita na Marriott Resort. Na yegada e mandatario a wordo ricibi pa e General Manager Sra. Karen Chastain.
“Riba invitacion di Marriott nos a haci un site visit pa wak tur e inversionnan cu a y ta wordo haci pa mantene y upgrade e hotel. Marriot mescos cu gobierno ta convenci den inverti y mehoracion di nan producto y awe nos a keda impresiona cu tur e inversionan cu ta wordo haci. Na e momentonan aki Marriot tin un grado di occupcion di 95%”, e mandatario a bisa den un comunicado di prensa, agregando cu den ultimo añanan Marriott a inverti 62 miyon florin den mehoracion.
Segun e comunicado, ultimamente Marriott a bin ta haci diferente renobacion y cambio den e Resort, awo cu esakinan a termina, a invita Oduber pa presencia esakinan den persona.
E renobacionnan a dura algun aña, caminda a renoba varios area y cambernan di e Resort. E gym a haya un renobacion grandi, e lobby tambe a haya un renobacion grandi te cu e Starbucks. Pa locual ta e Tradewinds Lounge, cu ta pa miembro exclusivo di e Tradwinds Club solamente, tambe a haya un mehoracion. Tradewinds Lounge cu tabata na piso 8 a wordo re-aloca pa piso 1 y na piso 8 a construi 3 camber di hotel extra. Fuera di esaki, tur e 411 camber existente di Marriott Resort tambe a wordo renoba. E area di terasa di e restaurant tambe a keda completamente cubri y e toiletnan di pafo tambe a ser re-aloca.
Segun e comunicado, vision di Oduber ta pa eleva e calidad di Turismo na Aruba y inversionnan manera esun di Marriott Resort sigur ta cuadra cu e maneho di Ministerio di Turismo. Aruba ta conoci pa ta un destinacion di calidad y e turista nan ta paga hopi placa nan pasashi y hotel. Pa e motibo aki, producto Aruba mester cuadra tambe cu e prijs cu e turistanan ta paga. Turismo ta keda e driver principal di nos economia.
