Minister di Turismo y Salud Publico sr. Dangui Oduber ta informa comunidad cu e resultadonan di turismo pa luna di october 2022 a drenta. A ser demostra un biaha mas den luna di october 2022 cu e cifranan a surpasa e nivelnan di mesun luna di aña 2019.
Den luna di october 2022 Aruba a ricibi 83,404 turista via nos aeropuerto. Un crecemento di 5.1% den comparacion cu luna di october 2019 unda Aruba a ricibi 79,389 turista. Locual a resalta den e reportahe tambe ta e recuperacion di nos mercado mas importante cu ta Estados Unidos cu a registra un crecemento di 4.7% porciento compara cu october di aña 2019, esaki ta representa yegada di 61,156 turista for di USA. Turismo ta sigui recupera, sigui crece y sigui surpasa nivelnan di aña 2019 cual sigur ta excepcional.
Aruba su recuperacion ta bayendo full speed y tur indicador ta mustra cu nos lo bay surpasa 100% di recuperacion den comparacion cu aña 2019 pa final di aña 2022. Aruba ta na di dos puesto mundialmente den e paisnan cu miho recuperacion di su turismo.
Siman pasa AAA a ricibi e noticia cu Aeropuerto Internacional Reina Beatrix a bira e prome aeropuerto na mundo pa ricibi e Green Globe Certification. Esaki ta un di e programanan di certificacion principal pa operacion sostenibel y maneho di biahe y turismo rond di mundo y Aruba mester ta hopi orguyoso pa e logro aki. Tambe e aerolineanan tin confiansa den Aruba y esaki bo ta mire den e diferente rutanan nobo cu nos tin na diferente pais.
Minister Oduber ta gradici tur e partner nan den turismo cu ta haci cu awe Aruba ta recuperando acceleradamente.
Danki na e pueblo cu a demostra di ta uno resiliente, ban sigui demostra nos cordialidad y duna e hospitalidad cu nos ta conoci pe. Turismo ta keda e motor principal di nos economia.
