Den un articulo publica anteriormente den Bon Dia Aruba, director financiero di Dr. Horacio Oduber Hospital Gregory Croeze a confirma e reto grandi cu hospital ta enfrentando na e momentonan aki pa ta escasez di personal. Segun minister demisionario di Salud, Dangui Oduber, gobierno demisionario di Aruba ta tumando algun paso pa yuda mitiga e problema aki.

Den un entrevista anteriormente cu Bon Dia Aruba, Croeze a splica cu e problema di escasez di personal den sector di cuido ta algo cu no ta sucede solamente na Aruba, pero ta un problema mundial. El a remarca cu actualmente riba e website di hospital tin un lista di vacatura cu tin alrededor di 50 posicion habri, locual ta nifica cu ta trata di mas o menos alrededor di 150 persona cu tin mester pasobra tin diferente posicion cu tin mester mas cu un persona.

El a sigui splica cu hopi biaha nan tin varios specialistanan medico cu ta bin y ta keda pa un termino hopi cortico, algun siman pa algun luna. Esaki ta nifica cu tin biaha tin vacatura ta keda habri por si acaso tin un specialista cu kier bin vast of un tempo mas largo.

El a agrega cu e problema aki no ta solamente pa personal di cuido di salud, pero ta conta pa hopi otro funcion tambe. “Nan ta prefera keda na unda nan ta pasobra eynan nan ta gana of nan por bay por ehempel Boneiro cu tambe lo paga un tiki mas. Esey ta e reto mas grandi cu nos tin pa haya hende pero tambe pa mantene hende pa keda akinan,” el a enfatisa.

Manera ya caba Croeze a indica, e problema di escasez di personal den sector di cuido ta un problema global pa varios tempo caba, pa cual motibo hospital a tuma algun iniciativa di nan mes pa yuda alivia e situacion aki.

El a splica cu como hospital nan a tuma e decision di no simplemente keda mas crusa y depende di otro, nan a scoge pa cuminsa cu varios curso pa yuda nan personal yega na specialisacion.

El a sigui splica cu e cursonan aki a cuminsa algun aña pasa caba. E HOH Academy ta duna diferente curso pa asina hendenan por specialisa nan mes, sobre todo enfermeronan, pa nan por logra cubri e posicionnan cu ta habri.

Recientemente a tuma luga e conferencia Quality of Healthcare Conference IVA na unda minister demisionario di Salud, Dangui Oduber tambe tabata presente. Durante su declaracionnan na miembronan di prensa local, Bon Dia Aruba a puntra e mandatario tocante e tema di escasez di personal na hospital y si gobierno ta tumando pasonan pa yuda mitiga e problema aki.

E mandatario a splica cu loke gobierno a cuminsa haci ta habri e oportunidad pa yiunan di tera cu a studia sea na Costa Rica, Colombia, Merca of Canada registra pa traha aki na Aruba. El a resalta cu nan no kier a cuminsa cu tur pais di biaha y a scoge pa cuminsa cu e paisnan aki prome pa wak con e ta bay den practica.

“Aworaki cu nos tin bon experiencia cu nos yiunan di tera, cu nan tin e calidad cu nos ta desea pa ofrece e servicio cu nos kier, aworaki nos ta bay amplia pa paisnan manera Mexico, cu ta un pais hopi interesante y cu tin Arubianonan cu a studia na Mexico y ademas e tin un bon calidad di cuido,” Oduber a indica.

El a sigui splica cu aworaki nan ta cla pa habri e horizontenan pa mas pais pasobra e reto ta grandi pa haya e personal aki. El a menciona cu hasta tin biaha nan ta haya specialista for di pais cu nan mes nunca a scucha di dje, pero nan tin cu acepta nan pa medio di un decreto ministerial pa asina por yuda cu e problema di falta di personal.

Oduber a duna como ehempel cu hasta na un pais hopi desaroya manera Alemania nan ta buscando dokternan di Costa Rica, Mexico, hasta di Venezuela, tur dokter den e region aki pa bay yuda na un pais desaroya manera Alemania.

“Aruba tambe mester habri su mente pasobra semper den pasado tabata enfoca hopi riba e calidad di cuido di por ehempel Hulanda door cu Aruba ta forma parti di Reino y pasobra nos tin paspoort Hulandes. Pa e motibonan ey semper nos a mara nos mes na e BIG registratie,” el a señala.

Pa e motibo ey, el a indica, Aruba a bin cu AruBig y su propio registro pa habri e horizontenan y ofrece e yiunan di tera mas oportunidad y no solamente cu ora nan kier specialisa den algun ramo di cuido ta Hulanda so nan por bay pasobra esey so ta reconoci.

Cu e expansion di AruBIG pa otro paisnan e studiantenan tin opcion pa bay studia na Costa Rica, Colombia, Canada, Merca y aworaki ta explorando Mexico y otro paisnan den e region cu tin e nivel di cuido cu nan ta desea pa Aruba.

E mandatario tambe a ricibi pregunta di miembro di prensa tocante kehonan cu ta wordo entrega di parti di ciudadanonan y pakico no ta atende e kehonan aki cu rapidez.

Oduber a indica cu reclamo tin semper y nunca por tene tur hende contento, pero e mandatario a enfatisa cu nan ta garantisa comunidad cu tur keho ta wordo atendi. El a agrega cu kizas no tur keho ta wordo atendi cu e mesun liheresa cu gobierno ta desea, pero kehonan t’ey y nan ta trahando pa atende cu esakinan.

“Nos tin tur comprension pa cada keho cu wordo entrega, pero nos kier garantisa comunidad si cu nos ta haciendo loke ta den nos alcance pa mehora e calidad di cuido,” el a resalta.

Minister Oduber a menciona e acuerdo di cuido cu stakeholdernan di cuido a firma aña pasa den cual tur e stakeholdernan aki a alinea riba e vision y kico ta e prioridadnan pa cuida medico na Aruba. El a menciona cu loke a sali afo di biaha di e acuerdo di cuido aki tabata cu mester reforsa e prome liña di cuido, busca mas dokter di cas.

El a splica cu pa mitiga e problema aki loke nan a haci ta habri un HOED na ImSan, cu ta consisti di cinco dokter di cas bou un dak, a habri un HOED na Piedra Plat, a percura pa tin mas praktijkondersteuners pa asisti e dokternan di cas y recientemente a ekipa e dokternan di cas cu praktijkondersteuners pa atende cu e problemanan di salud mental.

“Nos ta consciente cu e kehonan t’ey, e kehonan ta hopi y nos ta haci loke nos por pa mehora e calidad di cuido pa e ciudadanonan,” e mandatario a remarca.