Minister Dangui Oduber: Investigacion haci a demostra cu 76% di trahadonan den turismo ta satisfecho

Dialuna atardi Minister di Turismo y Salud Publico sr. Dangui Oduber a acudi na Universidad di Aruba bao invitacion di e facultad di tourism & hospitality. E mandatario a haya un presentacion riba e estudio cu e facultad a haci riba locual ta e satisfaccion y perspeccion di tur esunnan cu ta labora den e industria hotelero.

Pa realisa e estudio aki a haci un encuesta den e sector di cual un total di 569 trahado a participa. Awor cu e estudio a keda finalisa, esaki a wordo publica y presenta na entre otro Ministerio di Turismo y Salubridad, ATA, AHATA, ATSA y tambe na e otro partnernan cu ta importante den nos unico pilar economico.

Minister Oduber ta haya e resultadonan hopi interesante, caminda 76% di e participantenan a indica cu nan ta satisfecho laborando den e industria turistico. Otro punto importante cu a resalta di e estudio ta cu locual ta e salario y beneficionan ta keda importante pero e no ta locual ta mas importante den e parti decisivo di su trabao, e mandatario ta sigura.

Segun e mandatario e resultado di e investigacion ta duna un bon bista di e situacion actual di esunnan cu ta labora den e industria. E ta duna un bista riba e grado di satisfaccion, un bista di e perspeccion cu tin riba e beneficio y salarionan. E ta duna un bista tambe di con esunnan cu ta labora ta wordo trata y kico nan ta pensa di nan orario di trabao. Pues e investigacion a duna un bista general di con e situacion di trabao ta den e industria di cual a resulta cu 76% tabata satisfecho di ta laborando den e industria. Minister Oduber ta haya esaki un resultado hopi positivo teniendo na cuenta cu Aruba ta depende completamente for di turismo.

Minister Oduber a menciona cu ta nos hendenan ta e mayor patrimonio den Aruba su turismo. Ta e personanan cu ta traha den turismo ta esunnan cu ta atende tur dia cu e turistanan y ta nan ta esunnan cu ta brinda e calidad halto di servicio cu Aruba ta conoci pe. Ta danki na tur esunnan cu ta traha den e industria di turistico na aña 2022 Aruba a conoce cifranan halto di turista y e proyeccion pa aña 2023 ta mustra aun mas miho.

Finalmente Minister Dangui Oduber a gradici Universidad di Aruba, facultad di tourism & hospitality pa haci e investigacion y tambe tur e studiantenan cu a haci e encuesta aki posibel. E resultado aki ta demostra e resiliencia cu Aruba su turismo tin.