Diahuebs den conferencia di prensa Minister di Turismo y Salud Publico a anuncia cu Gobierno a tuma e decision pa NO introduci e famoso eigen bijdrage di AZV. Esaki ta relaciona cu e cortamento di 60 miyon den cuido imponi pa Gobierno di Reino Hulandes.

Minister Oduber a trece dilanti cu den varios ocasion Gobierno a menciona cu e ta dispuesto pa haci reforma den AZV di e manera cu e fondo ta keda sostenibel. Pa asina por garantisa cu AZV ta keda brinda e pakete di servicio cu ta ser brinda na nos aseguradonan. Minister Oduber a indica cu ta poco pais desaroya na mundo por brinda un pakete di servicio medico manera esun di AZV na su comunidad.

E mandatario a splica cu e proyeccionnan pa cu e gasto di AZV pa e proximo 15 aña no ta mustra nada bon. Esaki ta debi na e hecho cu Aruba ta pasando den un “dubbele vergrijzing” y tambe e hecho cu Aruba su poblacion no ta esun di mas saludabel. E mandatario a duna di conoce cu si e cosnan mester sigui manera cu nan ta aki 10 aña e gastonan di AZV lo yega den 700 miyon. Pa e motibo aki Gobierno mester tuma decisionnan responsabel pa garantisa cu e fondo di AZV ta keda sostenibel.

Minister Dangui Oduber a splica cu un parti di e reformanan ta e “five way model”, a menciona cu Gobierno Hulandes ta keda insisti pa corta 60 miyon den cuido, Minister Oduber a menciona cu Gobierno a haci tur su esfuerso pa yega na e 60 miyon di recorte, a yega serca si pero ainda no por a logra. Den cuadro di esaki na manera resposabel y siguiendo consehonan a dicidi si introduci e positieve lijst.

Positieve lijst (lista di remedi (cu cierto ingridiente) cu por wordo cumpra na bali por ehempel paracetamol, histal y otro remedinan over the counter)

Otro anuncio cu Minister Oduber a haci ta cu entrante 1 di juli e positieve lijst ta drenta na vigor. Esaki ta nifica cu remedinan manera paracetamol no lo bay wordo cubri mas pa AZV. E motibo di esaki ta cu e gastonan pa cu e remedinan aki ta mucho halto den comparacion cu locual e remedinan ta costa pa cumpra na e botica. Un ehempel di esaki ta cu un paki di paracetamol ta costa mas o menos 3 florin na botica pero cu un recept di bo doctor di cas e lo costa AZV alrededor di 16 florin.

Locual ta hopi importante pa menciona ta cu e positieve lijst NO TA CONTA pa pashentnan cu ta sufri di malesanan cronico. E pashentnan aki lo mester bin cu un carta di nan specialista y AZV lo sigui cubri e remedinan den e positieve lijst pa e pashentnan aki. Nos a percura pa esaki pa no afecta esnan cu mas mester di cierto remedinan.

Otro aspecto importante ta, e plan nacional di prevencion di cual e maneho di Minister Oduber ta basa riba dje. Esaki lo bay yuda baha e gasto di AZV den e proximo 5 pa 10 añanan door di purba cambia e estilo di bida den nos comunidad. Den esaki AZV lo bay hiba un campaña di conscientisacion riba con b’a hiba un bida mas saludabel pa asina previni y reduci e malesanan NCD’s den nos comunidad.

Minister Dangui Oduber un biaha mas mester desapunta partido AVP cu tabata boga pa bin cu e eigen bijdrage.

Minister Oduber ta compronde nan punto di salida tambe mirando cu ta AVP mes na 2014 a sinta cu tur e gremionan, sindicatonan y a firma pa bin cu e eigen bijdrage durante dialogo social. En todo caso Minister Oduber no a haya na su lugar pa pone un extra peso riba e pueblo di Aruba na e momentonan aki sin un vangnet pa esnan mas vulnerable cu ta e bijstandstrekkers y esnan cu tin solamente 1 pension. Gobierno di su banda ta keda negosha cu Gobierno Hulandes na un manera responsabel pa sigui brinda un servicio halto na nos aseguradonan.

Azv lo cuminsa un campaña di informacion pa asina tur asegurado ta bon na altura di e cambionan.