Minister Dangui Oduber: Hende no kier tuma cuarentena na serio lo haya boet

Minister di Salud Dangui Oduber a anuncia un otro decision cu ta trata di e personanan cu ta den cuarentena, esunnan cu tabatin contacto cu e pashentnan positivo pa covid-19 y esunnan cu a bin for afo den ultimo dos siman.

E hendenan aki ta bay ricibi un carta cu instruccion specifico di Gobierno di Aruba pa tene nan mes na e regla di cuarentena.

Den e momento cu e persona no kier adapta su mes den cuarentena, Oduber a splica cu nan lo ricibi un boet entre AWG 1.000 te cu 10.000 y si esey te ainda no ta suficiente, gobierno por medio di un decreto ministerial lo manda tur e personanan den ‘cuarentena obligatorio’.

Asina mes, el a menciona cu no tur hende ta tende e instruccion di gobierno di loke ta trata e ‘distanciamento social’ y hopi hende no ta mira na serio e gravedad cu coronavirus ta trece cune. P’esey nan ta urgi pa tur ciudadano cuida nan mes, nan famia y sernan keri, keda paden y sigui instruccion di gobierno.

Oduber a señala cu cada caso nobo ta un preocupacion, pero na mesun momento den cada caso ta identifica e persona, isola e persona, y asina evita cu e por sigui contagia mas hende.

El a reitera, cu no ta existi ningun motibo pa drenta den panico, na hospital no tin ni un hende cu tabatin mester cuido medico te na e momentonan aki. Tur caso positivo ta den su mesun cas den isolacion cu e situacion bou control.

Tambe el a bisa cu mester tuma na cuenta cu e pais por bay den un shut down completo, pero tur dia e scenarionan ta wordo discuti. Asina tambe nan a discuti si lo yega e momento cu tur caso positivo por keda den un mesun hotel, pero tin dos aspecto den e punto aki. El a declara cu si nan tuma e personanan den cuarentena – cu tin mas di 800 – ta berdad cu nan lo sali for di nan cas pa evita contagia otro miembro di famia; pero di otro banda nan momento cu ta hiba 800 hende pa un of dos hotel, esey tin e riesgo cu si un di e nan resulta positivo, di biaha e 800 hende por wordo contagia.

Esaki ta un escenario dificil cu Oduber a trece dilanti y tambe a comenta cu p’esey nan a tuma e decision di cera e frontera pa tur turista bay bek nan pais, pa motibo cu esey tabata e risico cu ta core cu si un di nan contagia na un di hotel, probablemente tambe ta core e peliger cu henter hotel lo wordo contagia.