Ta parce cu nada a keda henter of na ordo den e gobierno anterior, y esaki lamentablemente a yega te na porta di un institucion cu mester dedica nan tempo y energia den yuda esunnan cu ta sufri di adicion.

Despues di a tuma nota di caos na Fundacion pa Maneho di Adiccion Aruba (FMAA), Minister Dangui Oduber a cuminsa na busca solucionnan cu mester duna como resultado un maneho cu ta concorda cu tratamento profesionalisa riba e tereno aki. Esaki sigur no a bay facil den e prome aña, ya cu a topa cu varios contratiempo pa sikiera por a cuminsa traha.

Raad van Bestuur anterior tabata tin su dilema pa wordo desolvi
Tabata den luna di maart 2019 cu Oduber porfin a logra disolve e Raad anterior, ya cu e la cuminsa hole algo manera caso Lotto.

Varios di esunnan den e Raad anterior no tabata interesa pa entrega nan retiro, cual a pone cu e sistema a stagna totalmente. Mester bisa cu ta net esunnan cu nunca a atende un reunion di e Raad anterior ta esunnan cu a causa e stagnacion ,simplemente pa gusto of mal gusto, y pa colmo ta hendenan cu mester duna bon ehempel pa loke ta integridad. A pesar di esey, toch Oduber a logra reuni y haya un miho bista di tur esunnan envolvi riba e tereno aki, y asina por a cuminsa cu e vision pa un era nobo den loke ta tratamento di adiccion en general.

Raad nobo ta wordo instala y mester a cuminsa cu un inventarisacion total
Na fin di Maart 2019, porfin nan a dicidi di ‘let go’ y asina duna espacio pa instala un Raad nobo pa FMAA, y asina trabaonan por a cuminsa.

A cuminsa na atende asuntonan pendiente di e sindicato, pa asina por trece trankilidad bek na pia di trabao. Areglonan di pensioen tranca pa basta tempo a keda soluciona den menos di un luna di tempo, y aworaki ta den e proceso pa termina cu algun detayenan di algun personal cu tambe ta pendiente.

Den e Raad nobo tin un experto financiero y tambe experto riba e tereno di programanan di rehabilitacion y otro tratamento cu ta regarda adiccion en general. Por bisa cu den un tempo record, e Raad nobo a sa di hinca tur cifranan pa asina presenta un inventario real di loke ta sosodiendo na FMAA. Relatonan financiero di añanan anterior a keda revisa, y sigur por bisa cu no tur cos tabata na ordo, pero a sa di atende cu esaki na e formanan mas discreto y corecto cu ta posibel. Pa loke ta programanan di rehabilitacion mes, mester bisa cu no tabata tin un base solido pa cu esaki. Despues di un asina yama ‘investigacion rapido’, a bin constata cu e institucion ta carece di cualkier programa cu por ser considera como programa standard conforme cu protocolnan di un centro di rehabilitacion. Esaki mas cu claro a duna espacio pa crea situacionnan hopi incomodo pa tur cu ta envolvi den e institucionnan.

Infrastructura no ta cuadra cu normanan pa por duna tratamento adecua
Loke a resalta sigur ta e estado deteriora di e edificionan cu ta pertenece na FMAA y esun na Centro Colorado sigur ta esun mas afecta.

Esaki tin di haber cu e localidad y tambe falta di fondonan pa un mantencion apropia. Oduber a pone un suma disponibel pa asina cuminsa di biaha cu e trabounan, pa asina completa un renobacion den fasenan conforme e situacion financiero di FMAA. Tin tambe un preocupacion pa loke ta dos otro edificio cu tambe ta cay bou di FMAA. E preocupacionnan ta basa riba kico precies ta pensa di haci cu e edificionan aki, con pa converti nan den facilidadnan cu realmente ta cumpli cu standardnan halto pa duna e servicionan pa continuidad di e programanan di rehabilitacion y recuperacion di adiccion en general. Tur cos ta mustra cu mester bin un re-organisacion total pa asina defini kico precies lo haci pa asina e facilidadnan aki sigui duna e servicio optimal.

Vision y maneho nobo
Pa conclui, Oduber ta enfatisa cu lo bay traha cu un vision a largo plaso. “Nos tin e hendenan adecuado pa haci e preparacionnan pa e programanan cu lo wordo introduci” segun e mandatario.

Esaki lo cuminsa cu nan entrenamento, estilo training na pia di trabou, y cursonan specialisa pa cada un cu kier keda traha den y cu FMAA. Adiccion lo wordo trata segun e concepto di ‘Adiccion como enfermedad’. Tin reglanan y protocolnan pa esaki. E programa y e concepto no ta nada nobo. E ta wordo uza den tur pais rond di mundo y sigur e lo wordo combina cu otro programanan cu lo brinda espacio y oportunidadnan a largo plaso pa tur esunnan cu mester di e tratamento tanto na Aruba y den otro paisnan. Nos tin mira pa traha cu un institucion cu tin acreditacion y certificacion halto. Riba esey e minister lo amplia mas despues.