Dialuna ultimo, hospital a manda un comunicado caminda nan ta anuncia cu Hunta Directiva di Hospital ta bin cu un investigacion forensico den Laboratorio di Horacio Oduber Hospital (LabHOH), Minister di Salubridad Publico, Dangui Oduber a laga sa na Bon Dia Aruba cu e ta satisfecho cu e Hunta di Supervision a atende e caso aki cu tur seriedad cu e mester wordo atendi.

A transcuri mas cu dos siman di e denuncia haci den prensa (Amigoe), tocante un eventual caso di malversacion den LabHOH. Den e caso aki ta envolvi un suma substancial di alrededor di 1 miyon florin, solamente den PAP-test den LabHOH durante un aña. Un caso cu –segun e denuncia haci- ta involucra e mesun Director di e LabHOH y su casa. Ta calcula cu e cantidad di test cu supuestamente a bay Hulanda ta core den mas di 2 mil, posiblemente hasta 2.500.

Un comentario comun expresa den social media ta cu e caso aki lo keda na nada, y niun hende (nan) lo para responsabel di dje. Sinembargo, di parti di Hunta Directiva di Hospital a wordo expresa e compromiso caba cu e caso aki mester wordo investiga pa determina si ta trata di iregularidad, pa asina nan tuma e pasonan adecua. Pa Minister di Salubridad Publico, e investigacion lo mester determina kende ta esunnan responsabel y nan lo mester paga pa esaki.

E comunicado di Hospital ta indica cu tanto nan Hunta Directiva y Lab-HOH a tuma na serio e denuncia di ‘algun señal bastante contundente di iregularidad pasando den laboratorio di Hospital.’ Di biaha a cuminsa cu un investigacion preliminar interno y awor nan lo bini adicionalmente riba un investigacion forensico, realisa pa un compania externo. E conseho riba un investigacion forensico ta ‘basa riba indicacion di un presunto violacion di integridad,’ segun e comunicado di Hospital.

Responsabel Mester Paga
Relaciona cu e comunicado di hospital, Minister di Salubridad Publico, Dangui Oduber a laga sa na e matutino aki cu unabes e posibel caso di fraude na e laboratorio na Hospital a keda publica, el a tuma accion di inmediato. Un carta di caracter di urgencia e ser manda pa e Hunta di Supervision di Hospital cu e instruccion pa cuminsa di inmediato cu un investigacion forensico, pa asina por determina si e acusacionnan cu a wordo haci, tin base y por wordo proba.

Minister Oduber ta satisfecho cu e hunta di supervision a atende e caso aki cu tur seriedad cu e mester wordo atendi. Pa Minister Oduber lo ta inaceptabel pa haci negoshi cu salud di hende. E ta considera cu e acusacionnan ta hopi serio y grave. E investigacion lo wordo haci pa un compania di Corsou y lo ta uno completamente independiente.

E mandatario a bisa cu obviamente Directiva, mescos cu su persona, ta mira e seriedad di e caso aki. E ta kere, mas bien, esunnan cu mester wordo teni responsabel ta esunnan culpabel di e posibel fraude aki. E investigacion lo mester determina kende ta esunnan responsabel y nan lo mester paga pa esaki.

Minister Oduber ta satisfecho cu e investigacion aki lo cuminsa, ya cu esaki mester ta un les tambe pa tur cu kier trata haci negoshi cu salud di hende. E investigacion mes lo dura algun siman, el a laga sa. Sinembargo, di un manera responsabel e mandatario no kier anticipa riba e resultado ainda pasobra awor e investigacion lo bay cuminsa. Pero e kier pone enfasis si riba e hecho cu ‘si wordo proba loke ta ser bisa, lo tin consecuencianan serio.’