Siman pasa, Aruba Tourism Authority (A.T.A.) a ricibi e ‘Destination Resilience Award’ for di Caribbean Hotel and Tourism Association (CHTA), pa e trabaonan desplega durante e pandemia.
Esaki ta prome biaha cu e premio aki ta wordo otorga. E premio a wordo entrega durante un ceremonia di entrega di premio na San Juan, Puerto Rico como parti di e di 40 aniversario di CHTA su Caribbean Travel Marketplace. Jamaica, Antigua, Bahamas y St. Lucia tawata e otro islanan cu a competi den e mesun categoria cu Aruba.
A reconoce Aruba pa e maneho di e destino y e programanan di recuperacion cu a wordo implementa pa por a ricibi bishitantenan back despues di ceramento di frontera.
E documentacion compila a mas cu claro ilustra hopi otro logro entre otro digitalisacion di e plataforma di imigracion, introduccion di e Aruba Visitors Insurance. Un trabao duro y exitoso di parti di Aruba, cual A.T.A. tin e honor di por a acepta. Esaki ta un merito pa ambos sector publico y sector priva cu ta traha di cerca pa cu bienestar di nos turismo, incluyendo e ekipo completo di A.T.A.
Desde reapertura Aruba a experencia un recuperacion exitoso. Entre april y augustus 2022 yegada di bishitantenan a surpasa e cantidad di bishitante pa luna cu a ricibi na 2019, algo cu ta duna siguransa cu lo tin un recuperacion di 100% di bishitante global pa fin di e aña aki. Pa 2023 ta proyecta un recuperacion di 105% compara cu 2019.
E premio di Aruba tambe a sali den e publicacion di Travel Daily News. Por click y lesa mas na e link akinan https://www.traveldailynews.com/post/chta-awards-recognize-resilience-and-excellence-in-caribbean-tourism
Di e forma aki Aruba ta wordo mira mundialmente. Nos tur aki na Aruba mester ta orguyoso di loke nos a logra cu nos recuperacion.
