Dialuna mainta minister di Turismo, Salubridad Publico y Deporte sr. Dangui Oduber a haci bishita na Bushiri Beach. Recientemente e beach aki a wordo crea como un atraccion nobo pa nos localnan, nos bishitantenan y pa tene e magno evento di Beach Tennis Aruba. Aki e mandatario a tene un entrevista unda e la conta kico pueblo por spera di e evento menciona.
Segun un comunicado di gobierno, e prome fase di Bushiri beach ta cla, esaki ta e parti unda a pone santo blanco pa crea e beach. E di dos fase lo bay crea parkeo, drecha e landscaping y bin cu facilidadnan. Awor cu e prome fase ta cla caba ya por mira con bunita e ta kedando, ora e proyecto finalisa e lo ta un beach pa pueblo crioyamente bisa, asina e mandatario a expresa. Oduber a menciona tambe cu mesun cos por spera pa Baby Beach tambe. Unda ta e Lone Palm Staduim tambe lo wordo cubri cu santo blanco y asina extende e beach di Baby Beach. E proyecto di Baby Beach lo tin groundbreaking pa fin di aña aki segun e mandatario.
E mandatario a splica cu ya for di aña pasa despues di e evento exitoso di Beach Tennis Aruba a sinta cu e organisadonan di e evento unda a trece e idea dilanti pa muda e evento di Eagle Beach pa Bushiri Beach. E motibo di esaki ta door cu Eagle Beach ta un beach hopi uza pa nos localnan y nos turistanan. A splica e organisadonan e idea cu Gobierno tabata tin e tempo ey pa cu Bushiri y despues di varios deliberacion y varios reunion, e organisadonan a bay di acuerdo pa muda e evento pa Bushiri Beach. Awe por mira con bunita e beach a keda. Oduber a bisa di ta sumamente contento pa por ta e patrocinador oficial di e evento aki a traves di fondonan di ATA.
E aña aki Beach Tennis Aruba lo ta mas grandi cu nunca, ta spera un total di 1,400 participante y lo conta cu 45 cancha. E participantenan aki ta bin di 42 pais pa competi y ta bin acompaña cu nan famia y amigonan. Esaki ta haci Beach Tennis Aruba e evento deportivo di mas grandi na Aruba cu ta trece miles di bishitante riba nos isla. “E evento aki ta cuadra cu e carteranan cu mi tin esta e cartera di Turismo y Deporte, ta forma parti di nos vision di turismo deportivo. E evento aki ta acapara hopi atencion internacionalmente y e aña aki ESPN lo cubri e evento aki exponiendo Aruba den un forma positivo internacionalmente” asina e mandatario a trece dilanti.
Finalmente Oduber kier a gradici Sjoerd de Vries y su team pa organisa e di 10 edicion di Beach Tennis Aruba. Un evento cu ta contribui grandemente nos turismo y economia, sigur e evento aki tin sosten completo di Ministerio di Turismo.
