Minister Dangui Oduber: Durante ultimo añanan comunidad Arubiano a bay atras den salud

Actualmente na Aruba 70% di nos comunidad ta sobrepeso di cual 36% ta obeso. Na e momentonan aki tin mas cu 8600 pashent cu ta registra como diabetico. Esaki den comparacion cu 6 aña pasa ta un aumento di 18%. Esaki ta indica cu den transcurso di ultimo añanan nos comunidad a bay atras den nan salud, a bira mas ongezond cu tur e consecuencianan cu esaki ta trece cune.

E fondo di AZV tin su retonan. Nos ta biba den un comunidad cu no ta esun di mas saludabel, nos populacion ta den vergrijzing y consecuencia cu esaki ta trece cune ta cu hopi hende ta sufri di malesanan cronico. E gastonan medico ta keda subi tur aña y p’esey ta importante pa nos comunidad ta informa kico ta e situacion y ta bira mas consciente di nan manera di biba.

Segun e comunicado cu Bon Dia Aruba a ricibi ta indica cu e gastonan cu un pashent diabetico ta trece cune pa e fondo di AZV tambe ta alarmante. Un pashent diabetico ta costa e fondo di AZV mas o menos 8600 florin pa aña.

Hopi di esunnan cu ta diabetico mester dialyse tambe. Por lo general 75% di e casonan di dialisis por wordo preveni pasobra e causanan mayor di e problema di riñon aki ta sobrepeso, diabetes y presion halto. Un pashent di dialisis ta costa e fondo di AZV 90 mil florin pa aña.

Malesanan cronico por wordo preveni pero esakinan ta rekeri un cambio di estilo di bida. Un bida mas saludabel, un bida di haci ehercicio y come saludabel.

Pa por hiba un bida saludabel mester ta fisicamente activo. Sea bo ta cana, core bicicleta of practica un of otro deporte y cualkier forma di recreacion activo manera baile, yoga of Tai Chi.

Como minister encarga cu salud mi meta y vision ta crea un Sociedad saludabel, inverti den prevencion den salud. Crea un pais caminda tur hende ta bira mas consciente di e consecuencianan di no hiba un bida saludabel y promove e beneficionan di hiba un bida saludabel. Mi ta sinti cu esaki ta mi deber y obligacion pa di e forma aki baha e mortalidad na Aruba y tin un pais mas saludabel. Na final nos kier pa e fondo di AZV ta uno sostenibel. E Seguro medico general cu nos tin na Aruba ta paisnan desaroya manera Singapur y paisnan Europeo si tin un seguro medico general asina aki. Pa por garantisa e sostenibilidad di e fondo nos tur mester ta consciente si cu esaki ta rekeri un cambio di mentalidad riba e pais aki den sentido di purba hiba un bida mas saludabel.

Nos ta bay encurasha e comunidad aki pa hiba un bida saludabel. Haci ehercicio ta e miho medicina y prevencion den salud ta e solucion pa un miho sociedad.