Diamars atardi Minister di Turismo y Salud Publico sr. Dangui Oduber a reuni cu director di ImSan dr. Rajnherc y e president di e Hunta di Supervision di ImSan sr. Igmar Reyes encuanto e entrega di e cuenta anual di ImSan aña 2022. Un biaha mas ImSan ta haci entrega di nan cuenta anual dentro di e tempo stipula. Actualmente ImSan tin 268 trahado den servicio fiho.

Contrario cu aña 2021 caminda tabata tin un deficit den e cuenta anual, aña 2022 ImSan a logra yega na un cuenta anual neutral pero dunando mucho mas servicio. Den aña 2022 ImSan a duna 1500 servicio medico mas den comparacion cu aña 2021. ImSan a mustra riba e hecho cu den aña 2022 e costo nan den compras y transporte di productonan medico, aparatonan medico y servicionan mundial a conoce un aumento drastico (entre 7% – 11% porciento di producto y servicio procedente di Hulanda). Asina mes ImSan a logra cera un cuenta anual neutral, e mandatario ta splica.

MOU

Dia 8 di December 2022 un Memorandum of Understanding (MOU) di acuerdonan mas principal a keda firma entre ImSan y Dr. Horacio E. Oduber Hospital. Esaki a keda firma pa por mehora e cooperacion entre e 2 hospitalnan. Pa duna un miho servicio na e comunidad di Aruba y na un manera mas eficiente.

Inversionan

Conforme e maneho di ministerio di turismo cu ta pa haci inversionan continuo den cuido pa mehora calidad di cuido y servicio, ImSan a haci inversion den compra di 2 ambulance y tambe 7 stoel nobo pa dialyse pashent. Tambe inversionan a wordo haci pa reduci e lista di espera den retinologia.

Acreditacion di JCI

Den aña 2022 ImSan a haci hopi esfuerso pa por cumpli cu e standard di calidad y protocol di calidad di Joint Commission International (JCI), optimalisando asina tambe nan provision den cuido medico. ImSan su meta ta pa logra haya e acreditacion di JCI den e di dos cuartal di aña 2023. Acreditacion di JCI ta hunga un rol importante den e control di calidad y den e cumplimento di dicho calidad den e hospital. Nan ta enfatisa riba e mehoracion den e prestacion di cuido, optimalisando e maneho basa riba e midimento di cambionan clave den e aspecto di calidad. E acreditacion aki ta haci posibel tambe pa Aruba bay den e direccion di turismo medico, ya cu e seguronan medico internacional ta traha cu institutonan cu ta acredita pa JCI asina Minister Oduber a duna di conoce.

Radioterapia

Den aña 2022 ImSan a logra un “milestone” importante caminda nan a trata nan di 500 pashent completo cu radioterapia. Tur e pashentnan ta wordo trata na ImSan cu aparatonan moderno, “state of the art” di radioterapia. Tur esaki ta wordo haci den bon cooperacion cu e partner strategico di Miami Cancer Institute cu ta forma parti di Baptist Health South Florida.

Mehoracion den areglo di pensioen

Despues cu ImSan a bay den negociacionnan intensivo durante 3 luna cu diferente instancia cu ta segura pensioen. Riba 1 di augustus 2022 a logra sera un acuerdo nobo di pensioen caminda tur trahador inmediatamente a ricibi un acumulacion mas halto di e pensioen y cu un prima mas atractivo. Banda di esaki e areglo nobo ta ofrece otro productonan atractivo manera e oportunidad pa haya seguronan na miho prijs y interes di hypotheek mas abou.