Un aña grandi pa Aruba su turismo

Diamars Minister di Turismo y Salud Publico sr. Dangui Oduber a ricibi e cuenta anual 2022 for di Aruba Tourism Authority (ATA). Esaki a wordo entrega por medio di nan CEO sra. Ronella Croes conhuntamente cu e hunta di supervision. Minister Oduber a menciona cu e ta satisfecho cu e resultado y prestacion di ATA den ana 2022. Danki pa cumpli cu prociduranan legal y entrega e cuenta anual den e tempo stipula pa ley.

Minister Oduber a sigui bisa cu aña 2022 tabata un aña hopi fuerte pa Aruba su turismo. Aruba a conoce un recuperacion di su turismo di casi 100% porciento di su turismo stayover den comparacion cu aña 2019. Por a nota esaki den e cantidad di tiristanan stayover cu ta bishita nos isla, tambe por a nota esaki den e prestacion di e hotelnan, manera na e average daily rate y tambe den e RevPar cu twt mas halto den nan historia.

Aña 2022 tabata un aña excelente pa turismo y esaki bo por wak e bek den e entradanan di Gobierno door di e cresemento economico y den e tourism receipt publica pa Banco Central. E tourism receipt ta un indicador hopi importante cu ta midi e calidad di turistanan cu ta yega Aruba. Den aña 2022 maske cu a ricibi menos turista stayover cu na aña 2019, tog e tourism receipt a crese cu 118% na casi 4 biyon florin (e cantidad di placa cu turistanan ta laga atras den bo economia).

Esaki ta sigur un tremendo resultado di ATA cu gobierno di Aruba tambe ta haya un pida di e bolo. E plan di mercadeo di ATA ta dunando un excelente resultado. E campaña nobo di mercadeo ta titula “The Aruba Effect” y ta enfoca pa e turista no bin Aruba solamente pa nos clima y pa nos playanan pero pa un experiencia total. Uzando tur e atraccionnan nobo y inversionnan cu a keda haci pa mehora producto Aruba conforme e maneho di Ministerio di Turismo.

Minister Oduber a indica su maneho di turismo ta dirigi na trece turismo di calidad, e turista afluente cu tin un entrada di mas di 150 mil dollar pa aña. Ta sigui enfoca den diversificacion di nos turismo. Keda haci inversionnan continuo den producto Aruba. Keda enfoca den e strategianan nobo di mercadeo pa asina nos keda mas competitivo.

E mandatatio por mira bek riba un aña 2022 sumamente exitoso ATA. Minister Oduber ta gradici e management di ATA pa e bunita resultado aki. Tambe ta felicita e hunta di supervision di ATA pa e bon cooperacion y supervision cu nan ta haci pa asina e fondonan di ATA wordo maneha na un mihor forma. Sigur palabranan di gratititud grandi pa tur departamento di gobierno pa esfuerzonan pa atende turistanan y tambe tur esnan cu ta labora tur dia den e industria aki. Nos hendenan ta e asset di mas grandi cu nos tin!

Ta existi un bon sinergia entre ATA y Ministerio di Turismo, pa asina ATA ehecuta e maneho di Ministerio di Turismo conforme e ley di ATA. Danki na e bon cooperacion aki Aruba tin un aña grandi na 2022 y cu hopi antisipacion pa aña 2023 cu ya den e prome cuartal ta superando cifranan di aña 2023.