Minister Dangui Oduber: Cu expansion y renobacion di ImSan: ‘Ta spera cu 85% di pashent cu ta manda den exterior pa radioterapia por wordo trata na Aruba mes’

Diahuebs mainta, Minister di Salubridad Sr. Dangui Oduber a haci un site visit na ImSan pa cera conoci cu e finalisacion di e prome fase di expansion di ImSan cu a keda cla. Manera a yega di menciona caba, Imsan ta traha conhuntamente cu Baptist Health International pa garantisa proceduranan medico riba nivel di calidad halto y asina percura pa ImSan ricibi acreditacion internacionalmente for di ‘Joint Commission International Accreditation’ (JCI).

E ampliacion aki ta conta cu un inversion di mas o menos 60 miyon florin. Ta importante pa pueblo di Aruba sa con e placa a wordo inverti. E expansion y renobacion di ImSan lo percura pa genera 50 cupo di trabou nobo. Mas impresionante den tur esaki ta entre otro e departamento di radioterapia.

Afdeling Radiotherapie.
Tin acuerdo firma cu Baptist Health pa cu sosten di radioterapia. Pa prome biaha na Aruba e tratamento di radioterapia lo wordo ofreci aki mes. Esaki ta nifica cu pashentnan residencia aki na Aruba no lo mester bay mas den exterior pa esaki. Esaki ta significa cu e pashentnan lo keda den su seno familiar. Na mes momento esaki lo reduci e costo di AZV pa cu pashentnan cu ta wordo manda den exterior pa tratamento di radiologia. Actualmente Baptist ta ofreciendo training intensivo na e personal. Actualmente e aparato di radiotherapie conhuntamente cu Baptist ta pasando den e ultimo testnan pa asina por cuminsa funciona. Tur indicacion ta mustra cu e mashin lo ta den funcion dentro di par di siman dependiendo di e resultado di e testnan. Baptist ta streng riba e testnan y mester nan aprobacion pa cuminsa trata pashent. Den tur esaki e siguridad di e pashent ta primordial. Mester remarca cu e mashin di radiotherapie esta e model Varian Halcyon Elite cu ‘linear accelerator’ ta e prome den region di Caribe y Latino America.

Conforme cifranan recien di AZV, mas o menos 200 pashent ta wordo manda den exterior pa ricibi “Radiotherapie”. Cu introduccion di e afdeling radiotherapie na ImSan lo por atende 85% di e 200 pashentnan cu ta wordo manda den exterior aki na Aruba mes. Den casonan hopi complica lo manda pashentnan den exterior.

Afdeling Radiologie.
Aki ImSan tin tambe awor un CT Scan y un mashin pa echo. E di dos mashin di echo lo yega pronto.

Oogpolikliniek.
E renobacion y expansion di Imsan a haci posibel pa entre otro tur specialistanan di wowo aki na Aruba por traha central na ImSan cu equiponan nobo di wowo. Diabierna e prome operacion di retina a wordo realisa.

Sala di operacion.
Awor ImSan tin nan mesun anestesista pa asina haci operacionnan akinan mes. Diahuebs e prome narcose a wordo haci y el a bay hopi bon. Sala di operacionnan tin lo ultimo di mashinnan avansa.

Afdeling Sterilisatie van medische instrumenten.
Afdeling sterilisatie ta cla y ta den funcion pa prome biaha den propio edificio di ImSan. E proceso henter di sterilisacion ta reparti den tres fase. Fase uno ta consisti di colecta tur e instrumentonan uza (sushi) cu ta drenta den un camber apart, continua pa e segunda camber y fase 2 ta caminda nan ta wordo haci limpi y por ultimo ta wordo hiba den camber di sterilisacion.

Spoed Eisende Hulp.
Pa loke ta trata loke nos ta yama eerste hulp, e prome fase ta cla. Tin cambernan pa ricibi adulto y tambe tin un camber special pa atende cu mucha.

Plannan pa futuro.
Minister Dangui Oduber a expresa den nomber di Gobierno con contento, satisfecho y orguyoso e ta cu Imsan su vision y su desaroyonan pa cu cuido medico ta cuadra cu e vision di Gobierno di Aruba cu ta pa mehora e calidad di cuido na Aruba y como tambe crea un plan sostenibel pa Aruba pa asina e fondonan di AZV ta sostenibel pa den futuro. Esaki sigur ta cuadra cu vision di nos Gobierno. Prensa presente tambe por a experencia e recorido awe di e facilidadnan cu ta kedando cla na ImSan pa asina informa pueblo debidamente y transparente di e desaroyonan cu ta tumando luga y mira unda e placa ta wordo inverti esta na bienestar di nos cuido medico.

Minister Dangui Oduber a keda masha impresiona y ta sumamente orguyoso di a pone fondonan disponibel por medio di AZV pa asina cumpli cu e vision di su Ministerio y Gobierno cual ta mehora e calidad di cuido medico na Aruba. Cambionan grandi tumando luga den salud publico na Aruba. E cambionan aki lo ta na beneficio di nos comunidad y asina Minister Dangui Oduber ta cumpli cu e promesa di trece mehoracion den cuido.