Minister Dangui Oduber: Coronavirus lo impacta turismo

E situacion economico mundial crea pa motibo di Covid-19 ta uno hopi serio. Y un di e preocupacion cu minister Dangui Oduber tin ta nos economia cu ta depende completamente di turismo.

Si nos analisa e situacion mundial na China, Hapon y Italia por conclui cu Aruba tambe lo sinti efectonan economico di esaki.

Coronavirus a yega Merca y nos mercado principal cu ta New York. E tendencia mundial ta cu lo tin menos biahamento y ya caba e industria di aerolinea a pronostica un perdida di 130 biyon dollar. No solamente e industria di aerolinea lo keda afecta sino tambe e industria crucero. Gobierno di Merca ya caba a saca un “travel warning” pa Mericanonan pa nan no subi cruceronan. Consecuentemente esaki lo tin su efecto riba e industria y cantidad di bishitante crucero. Esaki tambe ta wordo monitorea y un plan ta wordo traha pa prepara riba e caida aki cu lo ta inevitabel manera situacion ta mustra actualmente.

Coronavirus a cuminsa na fin di december na Wuhan China y na e momentonan aki mayoria di paisnan rond mundo tin casonan registra. Aruba te na e momentonan aki no tin ningun caso di e virus registra.

Aruba ta preparando su mes for di varios simannan pa atende cu Coronavirus. E ta un situacion tenso pasobra e ta un virus cu ta contagia lihe y nos ta depende di turismo. Obviamente pais Aruba ta sigui tur e protocolnan y experto y profesional cu ta conseha gobierno tin experiencia pa atende cu brotanan.

Gobierno di Aruba ta prepara pa atende cu salud di nos comunidad na prome luga. Esaki ta loke ta mas importante cual tur instancia di cuido ta preparando nan mes debidamente.

Gobierno hunto cu ATA y APA a prepara un plan di contingencia caba cu lo wordo activa si ta necesario.

Aruba a pasa den momentonan hopi dificil den pasado cu a afecta nos turismo y economia enormemente. Por corda riba 911, Natalee Holloway y tambe e crisis financiero na aña 2008.

E crisis di Coronavirus lo tin su efectonan negativo riba turismo, nos economia, entradanan di gobierno, GDP y locual nos tur ta spera cu esaki no lo ta asina devastador pa nos economia manera cu ta sosodiendo na otro paisnan. Ta dificil anticipa e efectonan pero ta un hecho cu Aruba lo sinti esakinan.

Nos ta sigui monitorea y percura pa nos tin un plan di rescate economico pa activa esaki ora tin mester di dje cual ta di sumo importancia.