Minister Dangui Oduber recien a dicidi di haci un bishita na oficina di ATA na San Nicolas. Miho conoci como e Visitor Information Center, e oficina aki tabata un prioridad pa e mandatario aña pasa pa dun’e su ‘state of the art new look and feel’.
E Visitor Information Center (VIC) na San Nicolas ta di importancia vital pa movecion di Turismo y brinda informacion na turistanan. E oficina aki tabata cera pa mas cu 1 aña y mey. Manera cu tabata tin cambio di gobernacion, conforme maneho di Oduber a dicidi pa renoba y activa e oficina di Turismo na San Nicolas.
Despues di un par di luna funcionando den su bachi di renobacion, e oficina den luna di november y december a conta cu mas di 750 bishita di turista. Cada luna e cantidad di bishitante ta keda crece y bira mas hopi y esaki ta demostra con importante e oficina aki ta pa turismo na San Nicolas.
E oficina ta fungi como e curason y centro di informacion pa turista na San Nicolas, unda nos bishitantenan por disfruta di ‘walking tours’ y tambe por siña mas di nos dushi isla riba e television nan interactivo.
Oduber ta kere firmemente cu si bo añadi e instrumentonan corecto, un resultado exitoso so ta di spera. Esaki ta e caso cu e VIC unda cu hasta riba websitenan renombra turistanan ta laga nan bon comentario di nan experiencia na San Nicolas.
“Danki na e vision di Oduber pa cu e proyecto aki awe por wak mas movecion den San Nicolas.” E mandatario lo sigui monitor e oficina aki di cerca pa asina por sigui innova y asina por sigui contribui positivamente na economia di pariba di brug. Turismo ta nos forsa y e driver principal di nos economia. Oduber ta convenci cu e aña aki aun mas turista lo bishita e oficina y esaki ta contribui na e desaroyo economico na San Nicolas.
