Ayera nochi, via conferencia di prensa Minister Dangui Oduber ta haci aclaracion cu COVID ta un realidad y cu tardi of trempan mester siña deal cu e situacion.
“Tanten COVID ta un realidad na mundo, e ta un situacion cu Aruba lo mester deal cune y no solamente na Aruba, pero na tur otro pais rond di mundo” minister Dangui Oduber ta informa durante conferencia di prensa.
Manera por wak siman pasa a habri e siman cu 8 caso nobo cual a keda aumenta mientras e dianan ta pasa cu e hendenan cu ta test. Esaki a aumenta te cu 513 casonan positivo den solamente un siman. Oduber a informa cu e cantidad di persona cu a test ta 4,500 y cu den e ultimo dos dia, e cantidad di test bira menos hunto cu e resultadonan positivo.
Kico lo ta e medidanan cu lo bin segun e casonan ta asina halto? Lo bay tin medidanan severo, manera cera e frontera back? Segun minister Dangui Oduber, cera e frontera no lo bira un opcion. Esaki ta pa motibo cu lo kier crea e balans entre salud y economia ,y cu ta trahando hunto cu gobierno Hulandes pa por establece e balans aki.
Oduber tambe a informa tocante un pacient riba diadomingo, ken a wordo traslada pa hospital cu a test positive pa COVID. Pero ta aclara cu COVID no ta e motibo pakico el a wordo traslada.
