“E ultimo lunanan tabata hopi dificil pa nos tur na Aruba. Covid-19 ta pone nos realisa con importante bida ta y tambe con importante cuida nos mes ta y cuida nos salud. E ta pone nos realisa tambe con importantep revencion den salud ta.”

Segun e comunicado di gobierno aki, maneho di ministerio di Salud ta dirigi riba prevencion den salud y hunto cu PAHO, DVG y tur stakeholders den cuido na Aruba a lansa un plan nacional den prevencion. “E ultimo luna nan a pone cu nos enfoke tabata baha e contagio y cantidad di casonan positivo di Covid-19 y maneha e transmision den mihor forma posibel. Esaki no ta kita cu nos lo keda pone enfasis riba ehecucion di nos vision di prevencion den salud.

Na e momentonan aki gastonan di cuido medico ta sigui aumenta y como minister responsabel pa salud di nos comunidad nos tin cu tuma accion. Nos comunidad no ta esun di mas saludabel y e consecuencia cu esaki ta trece cune ta cu hopi hende ta sufri di malesanan cronico manera presion halto, sucu, problemanan cu curason y tambe e indice di esnan cu ta dialyseer ta haltisimo.”

E indice mundial di persona nan cu mester dialyse ta 8% y na Aruba esaki ta 16%, segun e comunicado. Cada pashent cu mester e tratamento di dialyse ta costa 100.000 Florin pa aña. No esaki so sino tur e otro gastonan cu ta subiendo.

Biba un bida saludabel no solamente ta yuda cada persona sino lo evita tambe cu gastonan medico lo bira impagabel. “Nos a pone den nos programa di gobernacion cu nos lo bay pone enfasis riba prevencion y nos no ta haci esaki solamente cu palabra sino cu accionnan concreto. Esaki ta nifica cu nos lo ta hopi mas agresivo den campañanan di conscientisacion pa comunidad come saludabel, haci ehercicio y biba saludabel.”

Segun Organisacion Mundial di Salud (WHO) cada ciudadano mester haci ehercicio por lo menos 30 minuut tur dia. “Nos comunidad mester evita di come productonan cu ta contene sucu y salo. Esakinan ta hopi dañino pa cu salud di nos comunidad. Ta nos deber pa nos educa nos comunidad riba e consecuencianan di no come y biba saludabel. Ta p’esey nos lo cuminsa cu diferente campaña di brinda informacion y tambe di conscientisacion pa cu prevencion di salud.” Nacionnan Uni a pone como meta cu pa aña 2030 nan lo kier reduci e NCD’s (non Communicable Deseases –malesanan cronico) cu 30% y logicamente Aruba tambe tin e deseo di logra e meta aki. E ta un meta comun pa nos tin un comunidad mas saludabel.

“Como gobierno nos ta trahando riba mas espacio tambe pa haci ehercicio, esaki nos a haci por ehempel na Malmok, caminda na e momentonan aki e contruccion di  Fase 2 Boardwalk Malmok y esaki ta den su fase final. Nos kier mehora e facilidadnan Deportivo pa haci nan atractivo pa stimula mas y mas hende participa activamente na deporte. Nos a introduci olimpiada escolar back despues di 8 aña. Nos a inverti den mehoracion di e trapinan di Hooiberg y tin deseo pa sigui drecha esaki den fase 2.

“Nos mensahe na comunidad di Aruba ta pa nos tur hunto ban come mas saludabel, ban participa mas activamente na deporte y haci ehercicio y na final di dia esaki lo contribui na un comunidad mas saludabel y un reduccion den gastonan medico. Mas importante esaki ta boost bo sistema inmunologico cu lo yuda combati Covid-19. Na un forma hopi agresivo nos lo bay educa, conscientisa y informa comunidad di e necesidad di prevencion den salud