Recientemente Conseho di Minister a aproba un concepto di un Decreto Nacional tocante e registro pa tur dentista y specialista den dentisteria. Esaki ta un documento historico pa motibo cu pa prome biaha ley ta reconoce dentistanan a base di criterionan di calidad. Un dentista cu studia na Hulanda, Canada, Merca y cierto universidadnan na Costa Rica y Colombia por registra y carga e titulo di dentista of specialista den dentisteria na Aruba.

P’esey e Decreto nacional aki ta haci posibel cu oficialmente pa prome biaha ta reconoce specialismo nan den e areanan di dentisteria. E personanan cu mester a warda riba un examen di dentisteria por yega awor na remarca pa traha na Aruba si nan ta cumpli cu e rekisitonan. Esnan cu no ta cumpli ta yega na remarca pa un permiso (un MB).

Esaki ta un proceso hopi mas facil cu e proceso anterior. Minister di Turismo, Salud Publico y Deporte a haci posibel pa amplia e cantidad di specialismonan. Hulanda ta reconoce solamente 2 specialismo, eseynan ta ortodontista y ciruhano maxi lo facial, y 5 diferenciacion. Na Canada y Merca tin mas tipo di specialismo, pero gobierno di Aruba lo reconoce 9 specialismo adicional cu ta riba nivel di e “Canadian Dental Association” di Canada y e “National Commission on Recognition of Dental Specialties and Certyfing Boards” di Merca.

E ley aki alaves lo trece claridad riba e areanan di competencia y estudio di cada profesion den e ramo di dentisteria. Esaki ta haci cu lo bin claridad riba kico un dentista of specialista mag of no mag haci conforme su estudio y e marco legal. Conhunto cu e departamentonan concerni lo sigui traha pa trece y mantene claridad pa e profesion aki y tambe pa otro profesionnan traha hunto y pa reconoce competencia- y specialismonan nobo den futuro.

Cu e ley aki Minister Danguillame Oduber ta alaves logra laga AruBIG drenta na vigor hunto cu e Instituto di Calidad pa asina mehora e regulacion di calidad na Aruba. Despues di casi 20 aña di intento e Minister aki ta esun cu ta logra cumpli cu e necesidad di regula e calidad di cuido y tambe pa cumpli cu e necesidad di pueblo pa cu nan salud. Ta spera cu na comienso di 2021 lo ta asina leu cu e Decreto aki lo pasa Parlamento y gobernador pa wordo implementa.

Minister Oduber a demostra cu accionnan concreto con a logra Arubig pa reconoce nos yuinan den tera. Algo cu ta historico.