Minister Dangui Oduber: Aruba Visitor Insurance relaciona cu COVID-19

E consecuencia di tin bishitante cu casonan positivo di COVID-10 na Aruba y no ta sigura lo trece problemanan financiero pa gobierno y hospital. P’esey ta importante pa cada bishitante cu yega nos isla tin e seguro cu lo cubri e gastonan aki, segun detaya den e siguiente comunicado di prensa.

Ken e ta cubri?

E seguro di biahe (Aruba Visitor Insurance) pa cubri tur bishitante di afo cu ta bin bishita Aruba y ta test positivo pa COVID-19 na nan yegada of durante nan estadia na Aruba. E no ta pa local cu ta desea di bay den exterior. E seguro di biahe lo bay ta unicamente disponibel riba e website di www.edcardaruba.aw desde 29 di juni 2020.

Kico e ta cubri y pakico e ta importante?

E seguro aki lo bay yuda e turista cubri e gastonan medico te na limite di e polisa relaciona cu COVID-19 manera consultanan di dokter, medicina, admision pa hospital, gastonan di intensive care unit, specialista, x-ray, laboratorio y di cuido. E seguro aki lo yuda reduci posibel gastonan grandi cu turistanan por laga atras relaciona cu COVID-19. Esaki ta un problema caba cu Hospital a yega di enfrenta den pasado. Cu un pandemia andando e riesgo por ta hopi mas pio. P’esey ta importante pa cada bishitante cu yega nos isla tin e seguro cu lo cubri e gastonan aki. E seguro aki ta un factor clave den reapertura di nos turismo. E seguro aki lo cubri tambe gastonan di isolacion pa bishitante cu ta test positivo pa COVID-19 y transporte special. E polisa lo cubri te na un suma maximo di 75.000 mil dollar. Mester tene na cuenta cu e parti di isolacion ta algo cu ningun seguro na mundo ta cubri.

Costo di seguro

Dekking pa e seguro ta depende di e largura di estadia di e bishitante. E costo minimo ta $15 pero no ta asina cu un persona cu estadia di 30 dia lo paga 30 bes $15. Calculacion di e gasto aki por wordo calcula riba e site www.arubavisitorinsurance.com. Minister Dangui Oduber a indica cu e seguro di COVID-19 ta obligatorio pa tur biahero di cualkier continente cu excepcion di nos studiantenan cu ta studia den exterior y residentenan di Boneiro y Corsou.

Kico ta e plataforma di migracion online?

E asina yama “online imigraction platform” ta un instrumento/plataforma online cu ta obligatorio pa tur turista cu ta bin Aruba of residentenan di Aruba cu ta regresa. Pa drenta Aruba lo mester yena bo informacion personal y cumpli cu e rekisitonan online dentro di 72 ora prome cu nan check-in pa nan vuelo. Nos ta den un situacion cu ainda nos ta den un pandemia y e plataforma aki lo fungi como e prome filtro di entrada pa Aruba. E plataforma aki lo ta disponibel di 26 di juni en adelante riba e website www.edcardaruba.aw.

Kico ta e rekisitonan pa un No-Residente y un Residente?

Na momento cu un persona subi e site www.edcardaruba.aw e lo mester haci un escogencia entre No-Residente y Residente. Pa e Residente e proceso ta uno hopi mas facil, e unico aspecto cu e Residente mester completa ta su declaracion di salud cu ta un serie di 4 pregunta cu a desaroya conhuntamente cu Departamento di Salud Publico. Mas cu claro tin filtro tambe pa verifica si e persona ta un Residente si of no. E proceso pa un No-Residente ta uno mas largo, banda di mester completa su informacion personal e NO-Residente tambe mester completa su declaracion di salud. Na mes momento riba e mesun website aki e No-Residente lo mester scoge su seguro y haci e pago pa su seguro di COVID-19 cu ta obligatorio. Un otro aspecto importante pa e No-Residente ta e parti legal di su bishita, lo hacie diferente pregunta pa sigura cu e turista ta bay di acuerdo y ta consciente cu tur reglanan cu ta vigente durante su estadia na Aruba. Por ultimo e No-Residente y Residente mester completa e parti di PCR Test.

Con e proceso di e PCR Test ta?

Manera ta conoci Aruba lo aplica un 100% test rate, esaki ta nifica cu tur bishitante incluyendo local mester haci un PCR Test prome cu drenta Aruba. E Test aki tin un costo di $75 y ta wordo paga riba e plataforma prome cu check-in. E bishitante por haci e PCR Test tambe na e pais di su salida y upload e test negativo riba e plataforma dentro di 72 ora prome cu su check-in. E PCR-Test ta parti e declaracion di salud cu tur persona mester completa prome cu nan check-in pa nan vuelo. E plataforma lo indica na e aerolinea si un pasahero a cumpli cu tur rekisito, si esaki no ta e caso e pasahero lo no por continua cu su vuelo pa Aruba.