Minister di Salubridad Publico, Sr. Dangui Oduber ta anuncia cu recientemente Hulanda a duna aprobacion pa administra un “Booster Shot” contra Covid-19. Esaki ta bay ta pa tur persona cu ta 60+ y tambe pa tur dunador di cuido.
Actualmente ya caba tin “Booster Shot” pa personanan cu ta sufri di malesanan cronico manera por ehempel cancer.
Locual ta importante pa menciona ta cu e personanan cu ta bin na remarca pa haya e “Booster Shot” lo wordo contacta pa DVG sea ta via e “Aruba Health App”, “e-mail” of yamada. Cu otro palabra e no lo sosode estilo di “walk in” pero via un cita (afspraak). E localidad cu esaki lo bay tuma lugar ta na DVG mes na e laboratorio bieu cu ta parti dilanti banda di e entrada principal.
Oduber ta elabora un tiki riba e ultimo cifranan di DVG encuanto e cantidad den porcentahe di personanan vacuna na Aruba. Actualmente 62% di henter Aruba su poblacion a ricibi tur 2 vacuna y 66% di e poblacion a ricibi e prome vacuna. Den e grupo di 60+ un total di 84% di e personanan a haya nan prome vacuna y 81% a ricibi tur 2 vacuna. Pa locual ta e grado di vacunacion actualmente esaki ta core den careda di 270 prik pa siman.
Oduber ta keda pidi pueblo di Aruba pa registra si ainda bo no a haci esaki. Baha e aplicacion di “Aruba Health App” y registra pa haya e vacuna. Tambe Oduber ta pidi e familiarnan mas jong pa yuda nan famia di mas edad cu no por traha cu e aplicacion pa registra, un yuda otro.
Segun un comunicado di prensa, Oduber kier a gradici comunidad di Aruba pa nan participacion den e campaña nacional di vacunacion. Hunto nos lo logra vence e pandemia aki. Ban sigui vacuna Aruba, ban sigui salba bida y ban prospera.
