Turismo ta keda nos unico pilar economico y e driver principal di nos economia. Minister Dangui Oduber ta sumamente contento y alabes orguyoso cu e resultadonan den turismo cu a wordo registra pa aña 2019 pa loke ta trata Turismo di nos pais.

Danki na turismo tin progreso economico y miles di persona na Aruba tin un entrada pa asina por mantene nan famianan. Aña 2018 caba e ser considera un di e miho añanan di historia di Turismo pa nos pais. E cambio por wordo sinti den Turismo y tur e indicadornan ta papia pa nan mes.

Turismo crucero a registra un aña record na aña 2018. Nunca antes den historia di pais Aruba e registra un cantidad di 815.161 pasahero crucero. Un aña sumamente exitoso pa Turismo crucero y mas cu logico esaki tambe a yuda contribui na nos economia.

Aña 2019 no tawata diferente y sigur aña 2019 a kibra otro record den cantidad di turista crucero. Pa aña 2019 APA NV a registra un cantidad di mas di 830.000 turista crucero y di e forma aki ta surpasa e record di bishitante di aña 2018 cu tawata 832.001. Sigur un otro logro grandi pa APA y tambe pa pais Aruba. No solamente turismo crucero sino tur e otro indicadornan di turismo ta positivo pa aña 2019.

Na momento cu tin otro aña exitoso asina esaki ta wordo sinti tambe pa tur esunnan den e sector turistico. Turismo crucero ta contribui na un manera positivo na e entradanan cu ta wordo genera pa cada turista crucero.

Aña 2020 lo bay bira un aña cardinal pa APA NV caminda tin varios desaroyonan grandi cu lo cuminsa. Tin e Proyecto di Port City cu lo bira un masterplan caminda lo tin un inversion di mas di $500 miyon di sector priva. APA lo inverti den upgrading di facilidadnan y asina percura pa por brinda un miho servicio na nos bishitantenan. Den 2020 tambe ta importante pa menciona cu pa prome bes Aruba lo ricibi e crucero di Ritz Carlton. E crucero luhoso a pone Aruba riba su itinerario y esaki ta demostra e calidad di producto Aruba.

Minister Dangui Oduber kier a gradici gerencia, staf y personal di APA NV pa e tremendo resultadonan aki. Tambe un palabra di gratitud pa ATA y tur cu a contribui y haci posibel pa tin un otro aña record den Turismo crucero.

Tur e indicadornan di Turismo ta positivo y esaki ta muestra cu e maneho di minister Dangui Oduber ta dunando resultado. Pa 2 aña consecutivo tin crecemento riba crecemento cual ta un señal sumamente positivo pa nos Turismo.

Turismo ta keda e driver principal di nos economia y ta keda demostra cu echonan con exitoso esaki ta den e periodo di gobernacion aki.