Durante e prome siman di trabao como Minister di Turismo y Salud Publico Sr. Dangui Oduber a reuni cu varios di su directornan y CEO cu ta resorta bao di su ministerio pa cu e di dos termino di Gabinete Wever Croes.
Recientemente Oduber a reuni tambe cu e director di AZV, Sr. Edwin Jacobs. Durante e reunion aki Oduber a comparti e vision cu ministerio di salud publico tin pa cu AZV durante e gobernacion 2021-2025.
Den e combersacion aki, cu segun un comunicado di gobierno tabata uno hopi ameno, Oduber a pone e prioridadnan pa cu e siguiente añanan. Aki a elabora riba e plan nacional di prevencion, unda AZV mester pone un presupuesto disponibel pa di e forma aki inverti den prevencion.
Oduber ta convenci cu sigur Aruba lo mira e resultado di esaki den algun aña y esaki tambe lo contribui pa tin un fondo di AZV mas sostenibel. Den cuadro di esaki Oduber a informa na e director di AZV pa yuda financia e proyecto di obesitas conhuntamente cu HOH.
Den e cuadro di e plan nacional di prevencion minister a toca e tema tambe di kico ta e miho manera pa reforma e gastonan di AZV. Manera cu AZV ta na e momentonan aki e no lo ta un fondo cu ta sostenibel pa futuro. Esaki teniendo cuenta cu vergrijzing, teniendo na cuenta tambe cu Aruba no tin e comunidad di mas saludabel. Minister a señala cu mester tuma accion en conhunto pa hiba un bida mas saludabel, pa percura pa cuida nos salud un poco mas y pa enfoca mas riba prevencion.
Oduber a combersa tambe riba locual ta e colaboracion cu tin entre e hospitalnan den reino y con ta mira e colaboracion aki. Naturalmente a papia riba diferente tema cu ta di interes pa ministerio di salud publico y proyectonan cu ministerio lo kier inverti aden. Tambe a papia di e cooperacion cu tin entre di HOH y Imsan, esaki ta hopi importante den cuadro di eficiencia y Sr. Jacobs ta comparti e mesun pensamento cu e mandatario.
Sr. Jacobs a compromete su mes cu AZV lo ta un socio cu lo percura pa yuda Gobierno pa garantisa cu e fondo di AZV ta keda uno sostenibel. Tambe a compromete pa haci e reformanan necesario pa por controla y maneha e gastonan na un miho forma posibel. Esaki ta pa den futuro nos tur por keda haci uzo di AZV, AZV ta un Seguro medico general cu ta cubri un cobertura hopi amplio den comparacion cu paisnan desaroya den mundo. Oduber a señala cu esnan cu ta biba na Aruba mester ta orguyoso di tin un seguro manera AZV. Na paisnan desaroya den mundo mes no tin un seguro medico general cu ta cubri e cobertura cu AZV ta cubri. AZV ta cubri tur persona cu ta inscribi na e registro di censo cual ta hopi particular asina e mandatario a trece dilanti.
Finalmente Oduber a menciona cu e ta mira un relacion di trabao hopi fructifero cu Sr. Jacobs y a palabra cu continuamente lo sigui reuni mescos cu lo sigui reuni cu HOH, Imsan, DVG, IVA, es decir tur cu ta den e cuido medico. Pa asina hunto percura pa mehora e calidad di cuido, mehora e servicio, baha e tempo di espera na e specialistanan y haci inversionnan den cuido. Esaki ta hopi importante pa sigui mehora e calidad di cuido y servicio na Aruba tabata palabranan di Oduber.
