Diamars mainta minister di Salud Publico Sr. Dangui Oduber a continua cu su reunionnan den cuadro di gabinete Wever-Croes 2 y e segundo termino di minister Oduber. E biaha aki a reuni cu hunta di directiva di Hospital Sr. Jacco Vroegop conhuntamente cu specialista dr. Casseres pa di e forma aki comparti e vision y maneho cu minister Oduber ta desea di hiba pa cu Salud Publico.
Segun un comunicado di gobierno, e enfoke di Oduber ta continua riba e mehoracion di cuido, baha e listanan di espera cerca di e specialistanan, amplia e capacidad di cama nan den e unidad di cuido intensivo. Tambe lo bay inverti den un plan di accion pa ehecucion di e plan nacional di prevencion y tambe bin cu un clinica pa combati obesidad. Esaki ta pa yuda e personanan obeso dor di ofrece nan guia por medio di un trayecto pa asina percura pa nan por mehora nan salud y hiba un bida mas saludabel cu e meta pa preveni complicacionnan di Salud pa motibo di obesidad. Tur esaki lo ta posibel via un sistema di track and trace cu pronto minister Oduber lo elabora riba dje. Oduber ta contento cu hospital tambe ta comparti e mesun maneho y vision aki.
E mandatario a menciona cu COVID 19 a trece un peso sobrenatural riba nos hospital. Hospital continuamente tabata bou di presion desde e prome dia cu Aruba a haya su prome casonan di COVID 19 na maart 2020. No obstante esaki Oduber ta sumamente agradecido cu e excelente cuido y servicio cu hospital di Aruba a brinda y ta brinda continuamente na tur pashent, segun e comunicado. Oduber ta di opinion cu Aruba ta orguyoso di tur e first liners nan cu a trata tur e pashentnan di COVID 19 den un tempo hopi dificil y a traha oranan largo. Aruba su hospital tin escasez na personal, pero danki dios Gobierno Hulandes, secretario di estado Blokhuis a manda personal di AMI pa yuda Aruba su hospital durante su temponan mas dificil asina e mandatario a trece dilanti.
Oduber a sigui bisa cu na e momentonan aki e situacion na hospital ta un tiki mas mihor mirando cu e cantidad di casonan di COVID 19 ta bahando. Danki na esaki tin menos hende tambe cu ta hospitalisa pa COVID 19 bahando asina e presion riba nos hospital. Minister Dangui Oduber a keda hopi satisfecho con e reunion a bay, e tabata uno hopi fructifero. Esaki ta debi cu den liñanan grandi e pensamento, vision y maneho di ministerio di Salud Publico ta cuadra cu esun di Hospital.
Finalmente Minister Dangui Oduber a keda hopi contento di e bon cooperacion cu tin entre ministerio di Salud Publico, gerencia di hospital y specialistanan cu a keda representa pa dr. Casseres. Pa tin alineamento den e maneho cu lo mester wordo hiba a haci palabracion pa haci e tipo di reunion nan aki na un manera mas frecuente pa asina e maneho y vision di aña 2021-2025 wordo ehecuta.
