Minister Dangui Oduber a reuni cu director di Imsan Sr Joel Rajnherc pa comparti e maneho 2021-2025. Durante e combersacion aki minister Oduber a comparti e vision cu e kier mira den Salud Publico na Aruba.
Segun un comunicado di gobierno, a splica e director di Imsan riba e maneho cu kier hiba riba mehoracion di e calidad di cuido, mehoracion di servicio y baha e tempo di espera na pa specialistanan. Lo bay percura pa busca mas specialista y lo bay inverti y ehecuta e programa nacional di prevencion, tambe lo bay enfoca riba hiba un bida mas saludabel.
Imsan ta hopi importante pa ministerio di salud den cuadro di e maneho cu kier wordo hiba. Durante e periodo di gobernacion di Gabinete Wever Croes 1, Oduber a brinda tur cooperacion necesario pa haci e inversionnan cu tabatin mester pa por finalisa e proyecto di radioterapia y tambe percura pa Imsan haya 22 cama cu por wordo usa pa shortstay hospital.
Pa e proximo periodo minister Oduber ta comprometi pa continua e inversionnan y busca un PET CT scan pa Imsan. Di e forma aki nos lo cuminsa percura pa haci turismo medico na Imsan. Tambe lo busca mas dokter di wowo pa reduci e wachtlijsten nan.
Loke ta hopi importante tambe pa den e periodo di gobernacion aki wordo cristalisa ta e JCI acreditacion pa Imsan. Tur e añanan cu a transcuri Imsan ta trahando hopi duro pa logra esaki y pa e periodo aki e lo ser logra.
E JCI acreditacion aki lo habri posibilidadnan pa Imsan pa por sigui crece.
Oduber por mira back un bon reunion y sigur ta conta cu tur cooperacion di Imsan pa percura pa e maneho di mehoracion di cuido, calidad y servicio wordo ehecuta, segun e comunicado ta finalisa.
