ORANJESTAD – Diamars dia 2 di april, Minister di Salubridad Publico sr. Dangui Oduber a bishita scol Dun’un Man na Piedra Plat riba dia mundial di conscientisacion di autismo.
Scol Dun’un Man ta un scol basico di enseñansa special pa alumnonan cu dificultad pa siña. Na scol Dun’un Man tin 30 alumno diagnostica cu autismo. Autismo no ta un inhabilidad, e ta un habilidad diferente.
E meta di scol Dun’un Man ta pa ofrece enseñansa y guia adapta na e alumno caminda ta tene cuenta cu su nivel y posibilidad. Integracion y funcionamento optimal den nos comunidad ta hunga un rol esencial. “Awe ariba un dia special nos a bay mustra nos sosten y brinda apoyo na nos muchanan special, mester yuda scolnan asina aki” e mandatario a expresa, segun un comunicado di gobierno.
E muchanan a keda masha contento ora nan a ricibi nan blaas blauw hunto cu nan donut blauw for di e mandatario. Oduber ta aplaudi cada maestro di scol Dun’un Man pa e bunita trabou cu nan ta haciendo cu e muchanan, sigur un trabou hopi noble. Di parti di Gobierno nos lo sigui aloca e fondonan necesario pa mehora cuido en general na Aruba, poniendo e ser humano central asina e mandatario a trece dilanti.
