Minister Dangui Oduber a duna di conoce: Strategianan pa bay bek na normalidad

Minister Dangui Oduber a bisa cu prome cu nos ta bay gradualmente bek na normalidad, esaki ta depende di nos capacidad pa reacciona contra coronavirus/Covid-19. Pero prome nos mester ta bon prepara, segun e hoben mandatario di salubridad publico.

Tin cinco exigencia – segun Oduber – prome cu nos lo por pensa como pais pa sali for di e crisis aki, cu a cuminsa dia 13 di maart na Aruba. Un di e prioridadnan ta stop e virus di plama, cu ainda nos no a logra ainda. Pero si nos ta logrando test mas hopi hende posibel.

Igualmente nos ta logrando un miho control tambe riba esnan cu ta resulta positivo pa mantene nan bon isola y tambe pone den cuarentena esnan cu tabatin contacto cu nan. E strategia aki ta clave pa cuminsa flexibilisa algun di e medidanan cu gobierno a introduci pa evita cu mas hende por a resulta contagia cu e Covid-19.

Pero otro strategia clave tin di haci cu e expansion di cantidad di unidad di cuido intensivo (ICU), tambe di ekipo, personal profesional y zorg pa tin mas remedi, ta fundamental.

Actualmente cu ayudo di Hulanda nos pais a logra un expansion di 12 ICU pa un total di 33, hunto cu ventilator of mashin pa hala rosea, remedi y personal. Nan intencion hunto cu hospital ta di amplia nos capacidad un tiki mas. Esaki pa deal cu cualkier situacion cu lo por presenta den futuro.

“E ta hopi importante na momento cu nos kier considera un dia yega bek na normalidad gradualmente. Logicamente bo mester ta hopi bon prepara den nos hospital…,” el mandatario a bisa.

Oduber a indica cu a indica e medidanan necesario ta vigente te proximo aviso. Pero esaki no ta kita cu nos ta cuminsa prepara y pensa como pais, ora cu nos ta bay na normalidad.

DVG

Di su banda, microbiologo di DVG, Dr. Wilmer Salazar a indica cu a base di analisis epidemigologico di Covid-19 na Aruba, nan ta mirando positivamente e desaroyo di e virus den nos comunidad. E ta haya cu nos ta bayendo riba un bon caminda.

Te hasta e ta haya cu si nos ta sigui asina y comunidad ta tene cuenta cu tur medida di accion pa evita cu mas hende ta wordo contagia, y di otro banda nos sistema di salubridad publico y autoridadnan competente ta sigui controla, Salazar por bisa cu pronto, eventualmente un par di siman of un tiki mas, Aruba por tin e virus aki bao control, y nan lo por bini cu otro medidanan menos pisa.