Minister di Salubridad Publico, Dangui Oduber ta actuando pa atende cu e menasa di coronavirus. For di momento cu e prome casonan di coronavirus a wordo registra na Wuhan, China a activa e team di expertonan cu ta conseha gobierno pa tuma tur e medidanan di precaucion y cuminsa prepara conforme tur e protocolnan y reglanan internacional.
Segun un comunicado di prensa, Aruba mescos tur otro pais ta sigui e reglanan di ‘International Health Regulations’ (IHR). IHR ta un tratado (verdrag). Hulanda como madre patria ta esun cu a firma y ta responsabel pa ehecucion di e tratado aki. Aruba como parti di Reino Hulandes tin e obligacion pa cumpli cune, pero Hulanda tin e obligacion pa asisti nos pa nos por cumpli cune. Rampenbureau no tin ningun obligacion pa cu IHR. Esey ta pa Minister di Salubridad Publico y specificamente Departamento di Salud Publico (DVG).
No ta prome bes cu departamento di salud ta hay’e confronta cu un brota. Esaki no lo ta ni e prome ni e ultimo y ta p’esey profesionalnan ta sigui training y educa nan mes pa prepara pa loke ta pasando. DVG tin varios plan dependiendo di e modo di transmision di un malesa. Un plan ta wordo adapta na e momentonan aki pa atende cu novel corona virus (2019-nCoV). Dokternan di cas a haya un Epi-Info. Esey ta pa informa e dunadonan di cuido y no solamente dokternan di cas, di e situacion y kico mester tene cuenta cune y otro informacion necesario. Ta importante pa tur e stakeholdersnan ta informa riba e tema aki.
DVG tin henter un team pa atende cu e tema aki, cu a haya training tempo di H1N1 virus y a maneha e brota riba Ocean Dream na aña 2009 y varios otro brotenan na Aruba. Alabes ta haya training y update continuo di entre otro PAHO con pa maneha cu brotenan incluyendo malesa respiratorio. Nan ta wordo asisti si mester door di profesionalnan riba e ramo di RIVM, PAHO y CARPHA. Tin contacto telefonico, via teleconferencia of e-mail diariamente si tin pregunta of update di informacionnan nobo.
Na DVG e team ta consisti di 15 persona. Hospital y ImSan/Ambulance ta depende di e situacion. Hospital y Imsan a prepara nan mes debidamente y na hospital tin camber apart den Sala di Emergencia destina pa casonan sospechoso di COVID-19 y caminda lo tuma muestra pa laboratorio tambe.
Como Minister di Salubridad Publico ta importante pa informa comunidad continuamente kico tur a y ta wordo haci. Asina ta importante pa menciona, comunidad por yama e hotline 592-2009 of 593-0917 of yama dokter di cas si en caso tin sintomanan di coronavirus cu ta dolor di cabes, keintura halto y problemanan respiratorio. E hotline aki ta disponibel 24/7/365.
Personanan cu tin sintomanan lo swab den garganta of nanishi y na man di personal capacita, y e camber cu wordo usa ta wordo desinfecta na un manera apropia y e muestra ta bay laboratorio di biaha.
Aruba ta preparando su mes conforme reglanan y proceduranan y pa es motibo tin algun opcion pa cuarentena, pero ta depende di cuanto hende. Mester tene na cuenta cu un caso lo wordo trata como un epidemia y asina por hisa e nivel di maneha esaki miho. Den e caso aki lo atende na un manera integral, pues na nivel nacional caminda cu e structura di Rampen lo drenta na vigor por medio di Minister President y lo atende di forma aki.
Hospital ta dispone di 42 camber caminda un persona/mucha por wordo isola. Si mester nan tin posibilidad pa amplia esaki.
Obviamente Coronavirus por tin consecuencianan serio pa nos Turismo. Den e structura di Crisis/Rampen na Aruba cu ta consisti di 8 cluster, ATA ta un di e clusternan aki. Nan a wordo informa caba mescos cu tur e otro clusternan tin contacto diariamente. ATA ta traha informe cu aprobacion di Departamento di Salud Publico y esaki ta wordo comparti cu ATA su contactonan na Aruba y Internacional.
Ministerio di Turismo, Salubridad Publico y Deporte ta keda mantene comunidad informa di tur desaroyonan cu tin pa loke ta coronavirus.
