– “Lo mi tin deseo pa na momento cu e cuater añanan di mi como minister di Asuntonan Social y Labor termina, mi lo por bisa cu nos ta bibando riba un Aruba liber di uitzendbureau nan”, e mandatario Glenbert Croes (MEP) a declara dialuna durante rueda di prensa semanal di gobierno.
Uitzendbureau a haci uzo di un buraco den ley unda cu trahadonan cu ta traha via uitzendbureau no tin oportunidad pa nan tin un futuro, segun e mandatario. Nan ta haya pues un oportunidad pa un trabao temporal por nan no tin un chens pa bay un banco haya prestamo pa cumpra un auto of un cas.
“E mensahe ta cu trahadonan mester wordo brinda miho posibilidad di futuro pasobra si nan no bay bira fiho unda nan ta bay traha, nan mester bay bira fiho na bo compania. Pero fiho nan mester bira”, e mandatario a comenta. E ehempel aki gobierno di Aruba tambe mester duna segun el a sigui expresa; departamentonan, fundacionnan y NV di gobierno. “Esey ta un proposicion cu mi ta bay trece na conseho di minister pa nos como gobierno lead by example. Nos mes e ora ey no por traha cu uitzendbureau, honra trahadonan dunando nan trabaonan directo.”
Ministerio di Labor den cuadro cu trabaonan coordinando cu Departamento di Labor, DPL ta trahando pa realmente representa e progreso laboral pa henter e pueblo trahado. Lo ta fortificando nan funcionamento pa por sigura mehoracion di salario, mehora bida, trato, salud y siguridad di tur trahado na Aruba wordo cumpli cu ne a base di cierto cambionan di leynan cu nan lo ta presentando. Tin di nan ta iniciativanan pa loke ta trata circunstancianan na trabao; siguridad, salud y trato cual ta 15 aña colga caba segun e mandatario. Pa un motibo of otro e ley aki a keda tranca y tambe locual ta structura di ley di salarionan nobo. Pasobra na Aruba tin hopi hende cu ta traha duro y haya hopi experiencia sin wordo balora pa esaki segun e mandatario. “Tin un motibo cu nos no ta haya nos studiantenan di Hulanda bek, pasobra nan ta sinti cu na Aruba nos no ta paga nan.” Bon Dia lo acerca algun uitzendbureau pa nan opinion riba esaki.
‘Mas forsa pa sigura nos hendenan haya trabao’
E maneho cu ta bay conta pa sector di casino, hotel, construccion y proyectonan PPP entre otro ta cu lo concentra riba profesionalnan local pa haya e trabaonan aki. Pasobra e mandatario ta bisa cu mayoria di biaha no tin mester mes di busca hende di afo pa cierto di e cupo di trabaonan aki. “Si e modelo di Oil & gas Industry Desk aki unda cu tur e autoridad di Job Matching, Employment Center, sigura pa nos hendenan haya trabao, si no tin specialista pa consulta sindicatonan. Den caso di Oil & Gas Industry consulta RDA (Refineria di Aruba) si ta necesario.” Enfatisando cu dentro di esaki lo bay cambia e nomber di Job Center pa Employment Center. “Pasobra no ta un side job nos ta regla akinan pa hende, ta un futuro nobo nos ta reglando akinan pa un ciudadano cu mester trabao.”
E mandatario a menciona tambe cu nan ta sinti cu DPL (Departamento di Progreso Laboral) mester mas forsa y mas drive sigura pa pone nos hendenan local riba trabao. “Aworaki DPL sea bo ta consulta nan pa haya un declaracion pa bo trece un hende di afo, of e ta un departamento unda hende cu bijstand ta registra pa sigui cobra bijstand. Pero un hende profesional cu ta desemplea of tur otro hende sin trabao no ta bayendo DPL pa check si nan por haya un trabao. DPL mester ta pro activo buscando trabao pa pone nos hendenan riba trabao. Y esey ta e vision nobo cu nos ta bay cumpli cu ne.”
