Fin di juli, redaccion di Bon Dia Aruba a publica un articulo tocante e preocupacion cu ta afecta agricultornan, principalmente tocante proyectonan cu mayoria di nan tin, pero cu a splica cu nan no ta conta cu sosten of apoyo suficiente di banconan local pa cuminsa cu nan proyecto.
Durante un conferencia di prensa cu Minister di Comunicacion, Telecomunicacion y Sector Primario, Chris Romero a ofrece diahuebs pasa, Bon Dia Aruba a puntra minister con e situacion di agricultornan ta cu e dilema aki.
Romero a splica cu esaki ta keda, manera el a bisa, ‘un challenge’ pa motibo cu gobierno no por dicidi pa banco, nan tin nan mesun maneho y den caso di un agricultor, ta dificil pa specifica kico nan entrada ta y eynan e banco ta haya dificil pa por fia nan un cantidad di placa.
Pa loke ta trata gobierno di Aruba, Romero a sigura cu Ministerio di Sector Primario, hunto cu Financia, ta pa duna nan cierto beneficio pa cu belasting y tocante esey el a manifesta cu su persona a manda un carta riba asunto, pidiendo pa yuda e agricultornan.
Romero a menciona e ‘Vertical Design’, cu ta sistema nobo pa Aruba, cu no tin hopi tereno pa haci cosnan nobo, pero cu tecnologia si ta posibel. Asina, hunto cu Ministerio di Infrastructura, a otorga na esunnan cu kier haci uzo di tereno pa produci nan producto convencional of cu metodonan nobo, tin riba 147 tereno disponibel.
