ORANJESTAD – Durante un conferencia di prensa cu minister di Transporte, Comunicacion y Sector Primario a ofrece ayera, el a papia tocante San Nicolas Ports Authority and Development y Fast Ferry cu lo por forma parti di e pilar economico di e isla.

Manera Romero a expresa , desde luna di december ultimo a ser firma un MoU hunto cu minister Martina di Corsou tocante e Fast Ferry. El a splica cu tabatin tardansa di escogencia di e operador sigur di Fast Ferry, pa motibo di e parti di financiamento cu Aruba mester cubri, pero Corsou mester tambe haci su parti, aunke minister Martina no t’ey mas.

El a splica cu Corsou ta buscando pa cubri e gastonan aki, pa asina por sigui cu e proyecto, cu minister Leito a tuma su luga pa sigui cu e siguiente fasenan

Romero a manifesta cu cierto proyectonan mester di terenonan liber den e refineria. Pa loke ta trata e Fast Ferry, cada proyecto ta wordo financia door di esunnan cu lo kier desaroya e proyecto, y Aruba mes no lo bay haci inversionnan pa por ehempel e waf, sino e desaroyadonan mes lo bay haci esey.

Hunto cu e terenonan y e Fast Ferry, tambe tin otro proyecto cu e inversionistanan ta hopi interesa, segun Romero a sigura. Por ehempel cu proyecto di aquacultura, cu pa nan por crea un espacio den e refineria y asina desaroya otro proyecto pa cultiva pisca den awa teritorial.

Cu e proyecto aki, lo bay cultiva tipo di pisca cu ta existi na Aruba. E desaroyadonan lo bay cultiva pa exportacion so, manera Romero a sigura, ‘unabes nan yega e size corecto, nan ta bay exporta’.

Tambe e proyecto aki lo por tin un exigencia di parti di gobierno, cu Romero a bisa cu un porcentahe di e pisca cultiva cu ta den awa teritorial mester wordo laga den libertad na Aruba tambe y asina trece bek cierto especie.

Romero tambe a duna di conoce otro proyecto pa trece barco crucero na area di San Nicolas. El a splica cu lo bay crea un waf adicional, pa asina agrega mas pa e economia di e pais. Ta existi hopi interes pa haci un Cruise Terminal na San Nicolas, cu tin un hundura corecto cu no mester coba pa trece otro tipo di crucero mas grandi.

Romero a informa cu San Nicolas Ports Authority and Development ta otro organo cu lo bay controla tur e proyectonan aki. E terenonan cu ta bin liber pa via di cooperacion di minister presidente Evelyn Wever-Croes y minister di Infrastructura Otmar Oduber, esey ta na caminda pa bay sigui haci diferente desaroyonan y supervisa esey.

“San Nicolas Port Authority sigur lo trece un desaroyo economico grandi pa San Nicolas y Aruba”, minister a afirma.

Tambe el a referi cu e concepto di ley ta den discusion na su parti final, y e siman aki mester keda cla, y e ora ey nan lo bay tuma e siguiente pasonan. E idea ta cu prome cu fin di juni nan kier trata e ley aki den parlamento, y asina ey e terenonan cu ta di refineria di Aruba ta wordo traspasa pa San Nicolas Port Authority and Development, cu tambe lo bay tin autoridad na parti di San Nciolas y Cura Cabay.