Minister di Transporte, Comunicacion y Sector Primario, Chris Romero a duna un conferencia di prensa ayera y a trece dilanti e situacion di e piscado di nomber Paulus Martijn, ken diasabra ultimo a sali riba for di Aruba pa tira pisca y el a perde na lama den awanan teritorial di Venezuela.
Tocante esaki, Romero di parti di Gobierno a expresa cu hunto cu minister di Husticia, Andin Bikker y tur instancia envolvi a tuma accion riba esaki. Romero a sigura cu e mes a tuma contacto cu Venezuela, cu tambe ta yudando den e buskeda.
Aruba a saca diferente elemento, manera helicopter, pa yuda den e buskeda aki. Pero tambe e piscadonan, hopi di nan a subi lama mes pa yuda den e buskeda di nan amigo.
“Di parti di Gobierno nos ta haciendo lo maximo”, Romero a sigura.
Ademas, el a trece dilanti cu como representante di e piscadonan, a cuminsa busca cierto aparatonan cu un buceado por uza, manera un GPS. “Si esey ta riba bo curpa y bo ta perdi, bo por cend’e y por ser haya despues”.
Di esaki, el a menciona cu tin aparatonan cu ya nan a cuminsa mira caba y ta evaluando e idea con por implementa esey; si por pone obligatorio pa un buceado, asina cu algo pasa e por ser haya despues.
