Minister Chris Romero: Prijs di transporte publico no lo bay subi cu bus nobo

Ayera durante un conferencia di prensa cu minister di Comunicacion, Transporte y Sector Primario, Chris Romero a ofrece, el a informa cu siman pasa, 8 bus nobo di Arubus N.V a yega na Aruba y pronto nan lo bay ta riba caya.

E proceso pa haya e busnan aki tabata un proceso hopi largo, pero segun Romero, el a gradici Parlamento, cu den tratamento di presupuesto 2018 nan a yuda y coopera pa busca e busnan aki.

Romero a recorda cu diferente incidente a pasa cu e busnan bieu, algun cu a pega na candela of nan tabata para riba caminda y ora esey tabata pasa, el a bisa cu como minister di transporte, mester a tuma accion pa cu e imprevisto aki y pa brinda un miho servicio.

E busnan tin cierto specificacion, por ehempel wi-fi; e pasaheronan cu haci uzo di e transporte publico ta bay tin wi-fi riba dje. Asina mes el a expresa cu nan tambe tin airco, cu esey no ta un luho pa via di e clima cu e isla tin y ademas tin charger pa telefon celular. “E ta bay ta sigur un bus hopi mas agradabel”, Romero a sigura.

Den e siguiente fase, Romero a bisa cu e busnan mester core den oranan stipula y ciudadano lo bay depende di dje. Tambe nan tin pensa di haci cambio di ley pa loke ta trata e ora cu e busnan tin cu yega y e oranan cu nan tin cu sali, mirando cu ‘cada minuut ta conta’. Segun Romero, esey ta forma parti di un structura nobo.

E otro 15 bus cu lo wordo presupuesta pa 2019 lo bin cu cierto adaptacion pa hendenan grandi y personanan cu limitacion, por ehempel, nan ta bay tin caminda pa rolstoel por drenta y nan lo bay ta construi mas abou pa e hendenan grandi por subi.

Di mesun manera, Romero a duna di conoce cu nan ta bay elimina e busnan cu ta un poco peligroso riba caminda y nan kier tin un solo fleta di tipo di bus pa baha e gastonan considerablemente.

Romero a sigura cu un di e preocupacionnan cu e comunidad tin ta si e prijs cu nan tin cu paga pa uza e busnan nobo lo bay subi, y el a contesta cu esey no ta e caso. “E servicio publico ta pa yuda esunnan cu no ta gana hopi placa, pero sigur ta pa brinda un miho servicio pa nan por tin un transporte publico cu nan por depende riba dje”, el a afirma.