Desde ayera dia 21 di maart, a drenta na vigor e posibilidad pa piscadonan cu boto di pesca registra na Directie Scheepvaart Aruba por ta riba lama durante Toque de Queda.
Esaki ta relaciona cu e peticion di piscadonan na Minister Chris Romero pa por subi lama durante oranan di anochi pa realisa nan practica, y teniendo na cuenta cu oranan di anochi ta considera como e miho momento pa pisca, e Titular di e Cartera di Sector Primario ta anuncia e posibilidad pa por ta riba lama durante oranan di Toque de Queda.
E posibilidad pa por subi lama durante orario di Toque de Queda, ta mara na cierto condicionnan:
- E boto mester ta registra na Directie Scheepvaart Aruba como un boto di pesca (vissersboot).
- Por tin te cu un maximo di 3 tripulante riba e boto di pesca
- Mester ta riba lama prome cu Toque de Queda drenta na vigor y yega bek despues cu esaki finalisa.
E posibilidad aki ta valido solamente pa botonan debidamente registra na Directie Scheepvaart Aruba como boto di pesca (vissersboot) y lo keda valido tanten cu Toque de Queda ta na vigor.
