Awe mainta minister di Transporte, Sector Primario y Comunicacion, Chris Romero a ofrece un conferencia di prensa pa splica e necesidad di busca otro forma di entrada pa isla Aruba, tumando den cuenta e golpi cu e area turistico a ricibi di e pandemia COVID-19.

El a duna di conoce cu a reuni cu diferente departamento, pa asina crea otro tipo di entrada pa yuda stimula y atrae mas economia a traves di sector maritimo.

Geograficamente, Aruba ta ubica den un parti di mundo caminda tin peliger chikito pa loke ta trata horcan y tormentanan por pasa den su awanan compara cu otro paisnan. E awanan ta relativamente seco, loke ta nifica cu no ta hopi hundo y tambe cu Aruba ta isla sigur. Cu e factornan aki, Romero a sigura cu diferente pais a puntra si por hancra nan barconan, pero tambe nan plataformanan petrolero ‘Oil Rigs’. Di e manera aki, lo por staciona den awanan teritorial di Aruba caminda cu lo genera un entrada adicional pa e pais.

Romero a expresa cu esaki ta pa motibo cu dos tin oil rigs cu ta den e parti zuid di e isla cu actualmente no ta trahando. Di mesun manera, el a splica cu e beneficio di esaki no ta solamente directo. Sino cu unabes cu un oil rig ta asina para den awanan teritorial di Aruba, e ta contribui na e caha di gobierno directamente, pa motibo cu ta paga tarifa conforme cu e peso y tambe ta paga diferente belasting cu ta concerni riba esaki.

“Esaki nos ta trahando pa hacie mas atractivo manera otro paisnan tambe a hacie”, Romero a comenta.

Di loke ta trata e beneficionan indirecto, Romero a bisa cu ta ‘spin-off effect’ cu lo bay crea unabes cu tin barco- y plataformanan staciona den awanan teritorial, cu ta pa diversifica e economia.

El a duna como ehemplo cu e barconan aki tin tripulantenan a bordo, cu mester di cuminda y otro productonan. Pero tambe mester piesanan y partinan pa mantene e plataformanan. Di e manera aki ta crea e spin-off effect. Tambe tin companianan local cu mester hiba of trece productonan, como tambe e parti di siguridad, cu segun e mes a señala, e manera aki ta mas grandi pa contribui compara cu e placa cu ta bay directamente pa caha di gobierno.

Un di e otro spin-off effect tambe ta e momento cu e barconan ta cambia di tripulante y nan mester bay nan pais bek y otro tripulante ta bin. Na e momento ey tambe lo mester di hotel, transporte, restaurant, etc. y e efecto lo bay ta mas grandi den e parti di economia.

Di loke ta trata e parti di beneficio maritimo, Romero a specifica cu esaki lo trece mas bida maritimo como tambe piscanan di otro partinan y esaki ta claramente contribui pa e sector primario, caminda e piscadonan cu ta biba di esaki tambe lo haya beneficio.