Ayera mainta, Minister di Transporte, Comunicacion y Sector Primario, Chris Romero a ofrece un conferencia di prensa pa e medionan local y asina a informa tocante algun maneho cu lo tuma luga na aña 2020, specificamente riba e parti di taxi.
Pa cuminsa, Romero a splica cu despues cu el a sinta cu diferente grupo y a haya diferente informacion di DTP, nan a haya diferente datonan pa mehora nan maneho.
El a menciona cu DTP ta un departamento cu ta den pleno reorganisacion pa bira mucho mas eficiente. Tambe tin varios control cu ta tumando luga y cu pa 2020 control lo aumenta, pero pa esunnan cu tin un Landsbesluit firma door di gobernador y pa por haci cierto control.
El a enfatisa cu control ta tuma luga y lo aumenta un tiki mas, pero esaki ta bin a base di cooperacion di otro ministernan, caminda nan tin cu purba di haya mas personal pa esey.
Reuniendo cu diferente grupo di taxi, minister a bisa cu nan a trece dilanti cierto puntonan. Un di nan ta e parti di hulp chauffeur, cu ta wordo exigi pa un miho maneho. A base di esey, cu informacion cu nan tin, un taxista ta un persona cu mester ta su mesun hefe. Manera e mes a sigura, ‘esaki ta un trabou di no work, no pay’.
El a duna como ehempel cu si nan mester bay pa motibo medico pa SVB, hopi biaha esey ta tarda. Na momentonan asina ta haya dos siman prome cu nan a haya e afspraak. Esey ta pone cu no ta eficiente mas. Pa no forsa nan pa bay traha malo pa motibo cu nan mester di entrada, ‘ta bon pa nos busca un otro instancia cu por brinda e servicio aki y por garantisa di un pa dos dia un hulp chauffeur na su luga’, el a sigura.
Romero a comenta cu di e manera aki nan ta zorg pa e servicio por ta mucho mas eficiente y no tin perdida niun caminda. Tambe ta yuda esunnan cu no tin entrada actualmente. Esaki ta un oportunidad pa funciona como hulp chauffeur.
Tambe a manifesta cu si un persona ta malo cu no tin entrada y nan tin debe, no por forsa nan pa bay core malo pa motibo cu esey ta nifica un riesgo.
Romero a duna di conoce cu e maneho aki, di cambia di SBV pa otro instancia ta hopi avansa. E maneho aki lo cuminsa pa 1 di februari 2020. Riba e dia aki, taxistanan lo por cuminsa uza un otro instancia cu por brinda eficiencia y duna nan e chens pa haya hulp chauffeur mas lihe y asina nan no perde entrada, cu ta necesario.
Di mesun manera, el a anuncia cu e dia ey tambe mester tin un director nobo pa esaki por cana debidamente.
Asina mes, Romero a referi cu ambtenaar of gelijkgestelde no mag di ta hulp chauffeur mas. Esaki ta basa den Bureau Integriteit, pa por cana manera mester ta. “Nos ta bin cu un maneho pa 1 di januari 2020, cu ambtenaar gelijkgestelde no mag di core como hulp chauffeur mas”.
Tur esaki ta den cuadro di varios reunion cu diferente grupo di taxista, pero tambe esunnan cu actualmente ta ambtenaar cu ta coriendo. Pa cu esaki, Romero a expresa cu lo duna tempo pa nan cambia e forma di traha aki, y unabes cu e periodo pasa, no lo wordo implementa mas. El a bisa cu semper tin excepcion cu ta pone cu si mester tuma luga, e lo tuma luga.
Tambe Romero a informa cu entrada di e isla pa mas di 90% ta pertenece pa turismo. Esunnan cu turista ta wak prome ta e taxistanan y nan mester duna un impresion positivo. Pa e mesun 1 di januari di 2020 hulp chauffeur no mag di tin right-hand drive (RHD). Desde e dia aki, Romero a comenta cu no lo tuma e autonan aki pa hulp chauffeur y esey ta bay pone cu mester duna un periodo pa haci e cambio.
Romero a menciona cu esaki ta pa via di siguridad, no solamente pa turista, sino pa hende local. Seguronan tambe a cuminsa cu nan no ta bay sigura e pasaheronan of lo cuminsa aumenta tarifanan. El a referi cu esaki ta pa uzo comercial so.
Pa personanan cu tin edad avansa y lo kier cuminsa baha cu pension por ehempel, Romero a sigura cu pa 1 di januari caba nan por cuminsa aplica na DTP. Esunnan cu tin 65 aña bay ariba y tin peticionnan aden, despues di e cambio di maneho nan ta bay haya dos aña di hulp chauffeur. Por bay na DTP cuminsando aña 2020 pa haci peticion y despues e permiso lo bin bek pa Pais Aruba.
Pa finalisa, Romero a duna di conoce cu na e momentonan aki, taxistanan por laga hulp chauffeur core pa 30 dia pa aña, y cu desde 1 di januari 2020, e cantidad lo aumenta pa 45 dia.
