Recientemente durante bishita di Director General Interino di Union Postal Universal (UPU), Pascal-Thierry Clivaz, Minister Chris Romero tabatin e oportunidad di haya un bista mas amplio di e direccion nobo cu e organisacion mundial aki ta bayendo. Aruba tambe ta miembro di UPU y ta importante pa nos pais keda debidamente informa di tur desaroyo cu ta tuma luga den e organisacion aki.
Clivaz a bin di bishita na Aruba riba invitacion di director di Post Aruba NV, Guillermo Raymond, den su calidad como secretario general di ‘Caribbean Postal Union’ (CPU).
UPU ta un unidad specialisa di sector postal di Nacionnan Uni, conoci como un organisacion mundial intergubernamental, cu ta mara na tratado y protocol di 192 pais miembro mundial. E tratado ta obliga gobiernonan pa duna servicio postal na un prijs pagabel. E operador postal designa na Aruba ta Post Aruba NV, cual ta encarga pa duna servicionan postal na nos pais.
Aruba ta bira un hub den region di Caribe y Latino-Amercia y aki ta unda UPU por asisti Post Aruba NV pa por realisa e labor aki.
Clivaz a splica cu UPU su miembronan tin 650 mil oficina na mundo, contando cu alrededor di 5 miyon trahado y cu e infrastructura postal mas grandi di mundo. Ta ampliamente conoci cu e ‘core-business’ di post na mundo a cambia for di brinda un servicio primordial di carta pa awor duna un servicio principal di pakete chikito. Pa cu e cambio di servicio aki e cooperacion cu Duana ta indispensabel.
Pa cu esaki UPU tin un programa digital yama CDS (Customs Declaration System) cu ta compatibel cu e programa Asycuda, cual ta esun cu Duana na Aruba ta uza. UPU ta enfoca hopi riba uzo di tecnologia moderno y recoleccion di data, pa asina tur servicio postal por mehora su servicio na beneficio di e clientela rond mundo.
Na final di e reunion e mandatario a gradici Clivaz pa su bishita y a intercambia un recuerdo cu su persona.
