Recientemente a tuma luga un reunion bastante interesante entre Minister. Chris Romero, y director di e companianan estatal den su encargo. Durante e reunion aki, Minister Chris Romero a haya un actualisacion global di e plannan y ehecucion di proyectonan cu ta tumando luga den e Companianan Estatal Arubus NV (Aruparking y Arutram), Setar NV, Telearuba NV, Post NV y ANSA NV.
Di su banda, Romero a keda sumamente satisfecho di mira e trabounan cu ta tumando luga na e diferente empresanan NV cu ta cay bou di su encargo. Por mira tambe e disponibilidad di e Empresanan Estatal aki pa realisa proyectonan den conhunto, cual ta representa un beneficio pa pais Aruba. “Mi por a tuma nota cu e NV nan ta hopi interesa pa intercambia ideanan cu otro, pero tambe traha cu otro. E ta algo sumamente positivo pa mira cu e Companianan Estatal cu ta bou di mi encargo ta trahando hunto y na beneficio di nos comunidad”, e Titular di e Carteranan di Transporte, Comunicacion y Sector Primario a duna di conoce.
Reunionnan informativo di e indole aki lo sigui tuma luga pa asina Romero tin un bista directo di e vision y ehecucion di plannan cu a keda treci dilanti di parti cada compania den e ultimo temponan.
