Si introduccion di e gedoogbeleid ta un violacion fragante contra e tratado internacional di proteccion di fauna y flora marino cu Aruba ta mara na dje, minister Chris Romero a reacciona bisando cu niun tratado internacional ta prohibi spearfishing.
E tratado internacional mas bien ta busca protege nos medio ambiente den e caso aki marino. E ta haya cu nan ta dos diferente cos. Minister Romero a agrega cu e prohibicion ta algo local y no internacional, ya cu den tratado no tin nada cu ta prohibi spearfishing. E ta haya cu nan ta dos concepto cu mester kita full for di otro. P’esey e no ta haya cu esaki lo por ocasiona algun tipo di sancion internacional.
“Anos akinan na Aruba a bin cu e prohibicion aki,” el a bisa.
E mandatario a bisa cu e problema por wordo presenta si bo cambia leynan locual por trece consecuencia. E no ta haya cu gedoogbeleid no ta algo straño. Ya cu e tolerancia aki si ta existi caba pa tira por ehempel Lionfish. E ta haya cu e ta ainda mas delicado pasobra Lionsfish si bo ta hay’e den coral. El a trece otro ehempel di Hulanda cu tambe tin gedoogbeleid, pero pa cultivo di cannabis.
Necesidad
Den e caso aki y den cuadro di e gedoogbeleid e persona cu ta tira pisca cu harpun lo ta den cierto area y den lama bruto, unda no lo tin consecuencia pa niun coral. Pero si pa medio di nan actividad nan lo kier produci entrada of algo di come.
Encuanto e grupo di 44 piscado cu a firma un manifiesto pa por sigui nan actividad di tira pisca: Cuanto di nan ta depende berdaderamente di esaki pa mantene nan famia?
E mandatario a bisa cu e ta conoce varios di nan cu ta depende directamente di e tipo di piscamento aki. Algun di nan ta hende humilde cu a perde trabao of tabatin famia cu no tabatin trabao. Te hasta algun di nan ta gana un salario minimo, pero tin famia cu ta pasando den dificultad. P’esey e ta haya cu si e situacion aki di spearfishing tabata bon regula tabatin posibilidad si nan tabatin nan KvK cu nan tambe por a aplica pa FASE. Nan kier regula e situacion aki pa brinda e hende aki un oportunidad, segun e mandatario.
Gedoogbeleid versus landsbesluit
E ta kere cu e concepto cu un tirado di pisca ta bin pa destrui lama mester cambia. P’esey nan kier bin cu un gedoogbeleid, pero di un manera regula. Nan a bin cu un gedoogbeleid, ya cu eventualmente si nan lo a traha un landsbesluit e chens t’ey cu por ta Gobernador no ta fim’e. Ya sea cu e landsbesluit no ta cumpli cu cierto cosnan. Of e ta hinca Aruba internacionalmente cu tratadonan.
“A nos tin pa zorg pa esey no tuma luga,” e mandatario a declara.
Esaki a base di diferente advies cu nan a haya for di diferente comision. Nan ta hincando e consehonan den e cambio cu nan kier haci sin cu ta wordo viola tratado internacional. Mientras cu e ta haya cu p’esey nan a bin cu un gedoogbeleid. E ta un maneho di tolerancia. Pues gobierno por bin cu cambio riba e ley, pero tambe nan lo por lage como un gedoogbeleid tambe, manera otronan similar cu ta tumando luga.
E ta haya cu berdaderamente tin hendenan cu por bay pro of contra di e decision aki. Minister ta consciente cu tin hende cu kier cuida medio ambiente, pero e ta haya cu bo por hacie permitiendo e piscadonan pa nan por sigui eherce nan actividad di tira pisca.
