E casnan priva di cuido di nos grandinan ta laga hopi di desea asina minister encarga Alex Schwengle ta bisa. Tin un ley cu a wordo aproba den parlamento pa regla e sector aki, pero ta falta implementacion ainda. Pero e mandatario ta bisa cu otro aña lo bin cu un plan y man duro riba e cuido di nos grandinan.
Sr. Schwengle ta menciona cu Inspeccion di Salud Publico cu a keda institui recientemente, ta bay sostene nan door di cuminsa realisa inspeccion. Pero nan lo haya un periodo di gracia di un aña durante 2017 pa nan tene cuenta cu e puntonan pa eleva e calidad di nan cuido of servicio. “Esaki ta nifica cu otro aña nos lo sali duro controla nan.”
Ya caba e mandatario a adverti cu e aña aki nan ta bay ta ainda suave cu nan, pero sin tene cuenta riba kico lo por ta e resultado di eleccion, minister Schwengle a adverti cu na 2018, unda bes cu aña lo habri, gobierno lo ta duro cu nan. “Pasobra nos ta duna nan un aña di tempo pa drecha nan servicio”. Tur e puntonan cu nan mester a drecha, ta conoci y el a wordo documenta y duna na cada cas priva di cuido di nos grandinan, e ta splica.
Cuido di nos grandinan y AZV
E minister ta bisa cu tur partner envolvi riba tereno di cuido pa nos grandinan entre nan SABA, ta haciendo analisis pa pasa parti di e cuido intra mural pa AZV, pero ainda nan mester haci mas estudio, prome cu nan tuma e decision aki. E mandatario ta haya cu e posibilidad di traspasa e tipo di cuido aki pa nos grandinan pa AZV, lo resulta hopi mas facil pa nan bin cu un proceso di organisacion structural y financiero. Ya cu via gobierno e cantidad di personal den e sector aki ta asina grandi cu e no ta premira cu aki 10 aña gobierno lo por tin e capacidad financiero pa atende lihe y cumpli cu e necesidadnan cu un Stichting manera SABA tin mester di dje. “Esaki ta e motibo cu nos kier buta na AZV, no pasobra mi ta kere cu nos ta bay spaar placa.”
E mandatario ta sigur cu pa añanan largo diferente gobierno a confronta e situacion cu tin un lista di spera largo di hendenan cu a solicita pa drenta SABA. Minister Schwengle ta laga sa cu e no ta mucho contento cu e situacion aki, como cu tin 300 hende riba e lista di spera, ora e gobierno actual a bin na mando. Y actualmente e ta sigura cu e lista a bira 100 hende interesa pa bay SABA.
Mas cama y mas presupuesto
Nan lo tin pensa di bin cu mas cama na SABA, pero ainda nan no sa sigur cuanto nan lo bay ta, y cuanto e gastonan ta bay ta pa cama. E ta kere cu ainda nan mester di un aña pa prepara un bon plan strategico pa cuminsa implementa esaki na januari 2018, sin cu necesariamente nan a mester aumenta e subsidio substancialmente.
Segun e minister logicamente e gastonan dedica pa e cuido di nos grandi ta bay subi, si nan kier mehora e servicio aki cu nan kier traspasa pa AZV. E ta bisa cu e lo kier mantene e gasto aki na 23 miyon florin, pero e no por premira con hopi e cifra aki lo por bira. Sinembargo e mandatario ta kere cu e cifra di hendenan cu lo mester di cuido en general ta bay aumenta. P’esey e kier bin cu un cambio riba e maneho aki pero cu bon documentacion, bon vision y bon plan strategico hunto cu AZV y demas partner di e veld, entre nan SABA, SVb y WGK. Pero tambe parlamento mester carga su responsabilidad si nan ta asigna e presupuesto necesario cu e mester pa ehecuta su plan strategico, segun sr. Schwengle.
Igualmente e ta recorda cu nan a bin cu un plataforma pa cuido di nos grandinan -cu segun su opinion- e ta funcionando bon. Pronto e lo bay haya nan cuenta anual di aña pasa, unda e mandatario ta haya e pensamentonan di tur esunnan envolvi den e tereno aki.
