Minister Bikker tocante indexering y accion di SPA ‘Nos ta trahando un contrapropuesta, pero mester mas tempo’

Durante un conferencia cu Minister di Husticia Andin Bikker a ofrece ayera, el a splica con ta e situacion tocante accion cu Sindicato di Polis di Aruba (SPA) a tene siman pasa, den cual nan hunto cu otro sindicatonan a uni pa exigi pago di indexering.

Bikker a bisa cu el a reuni diahuebs pasa cu SPA. Aunke tema di indexering no ta regarda cartera di Husticia so, el a sigura cu gabinete completo tin lunanan largo cu ta sintando cu tur e representante di cada sindicato riba e tema aki, cu ta cay pa cartera di Finansa y esey mester fit den e cuadro di presupuesto.

Di e manera aki, a resulta cu sindicatonan individual y su miembronan a cuminsa bira impaciente y esey a desemboca tur e accionnan cu a tuma luga. Loke a pasa ta cu sindicato SPA a manda un carta cu no a drenta Ministerio di Husticia, a drenta via general y esey tabatin un fecha limite di 3 di october, siman cu gobierno tabata den Parlamento cu diferente reunionnan y nan no a detecta e fecha limite cu e carta tabata bisa.

Na e momento ey, Bikker a declara cu e sindicato mes a sinti cu Gobierno no a duna atencion pa e carta y esey a pone cu miembronan a sinti cu nan a keda neglisha. Pa e causa ey nan a bay cu accion.

Bikker a comenta cu den reunion di diahuebs pasa, el a splica cu e tema aki ta algo cu Gobierno te atendiendo na mesa, pero esaki ta regarda diferente ministerio y cada minister mester bay sinta cu cada sindicato.

Tambe, Bikker a expresa pa nan cua ta e retonan cu Gobierno ta pasando aworaki y nan ta trahando un contrapropuesta, pero nan mester di mas tempo, pa motibo cu esaki mester ta presupuesta pa por yega na un oferta p’e y manera tur hende ta conoce na e momentonan aki Gobierno ta bezig cu presupuesto di aña 2020. Pa ley Bikker a declara cu e asunto mester wordo trata prome cu dia 15 di december y mester wordo trata manera Caft a bisa, a corto termino.

Ademas, Bikker a comenta cu si nan mes como Gobierno tin espacio huridico pa por finalisa e presupuesto den cual tambe tin presupuesta e parti di e contrapropuesta, e ora ey nan mester tin un poco di espacio pa caba di delinea di manera responsabel kico e proposicion lo bay ta.

Di loke ta trata e reunion den cual SPA a señala cu nan no kier tende mas splicacion tocante e tema di indexering, Bikker a manifesta cu e ta respeta nan decision, pero e hecho ta keda cu Gobierno mester di mas espacio, pa motibo cu na final di dia, nan ta den deliberacion cu Hulanda constantemente riba e tema.