ORANJESTAD – Den un conferencia di prensa, Minister Andin Bikker a papia tocante e situacion di presion cu asunto di asilo politico ta causando den comunidad di Aruba, y con gobierno por atende cu esaki.
A puntra e mandatario si e situacion na Aruba sigui empeora, y mas hende sigui bin Aruba, con lo para cu e presion di comunidad, con gobierno mes lo trata cu esaki, mirando e comentario negativo di hende riba medionan social.
El a contesta cu e tema ta tumando tempo, dedicando na goberna un pais cu problema interno y na mesun momento ta enfrenta cu reto di otro pais. E ta bisa cu ta importante pa comunidad di Aruba sa cu gobierno tin e tema como prioridad.
Nan ta purba atende cune ‘na e miho manera posibel’, unda nan ta tene na cuenta derecho humano di tur hende envolvi na Venezuela y na Aruba, purbando di minimalisa e impacto riba comunidad.
“Nos ta pidi comunidad e sentimento di compasion y conviviencia cu esunnan cu ta aki a base di tratado, pasobra a permiti pa nan keda. Tin hende ta bisa pa elimina tratado y manda tur hende Hulanda, e no ta bay asina”, e mandatario a splica.
El a remarca cu e pais ta autonomo. Un pais cu ‘a lucha pa para riba nos mesun pia’. Ora cu un pais ta autonomo, tin responsabilidad cu ta bay cune. Un di esunnan ta e tratado di derecho humando y di refugiado, p’esey ‘tin cu tene nos mes na tratado’.
Den e temporada aki, e ta bisa cu mester busca balansa den kico por, pa asina no recuri den panico y odio. E ta bisa cu mester tin trankilidad y siguridad pa atende ‘mas miho cu nos por’. Sinembargo, e ta bisa cu ta causa presion y ta un situacion inhusto, pero esaki ta cosnan cu mester experiencia desde cu a drenta den gobernacion, y tempo prome caba.
E ta bisa cu ta enfatisa cu locual nan kier ta trankilidad den comunidad. “Mi ta wak comentario cu gobierno a perde bataya. No ta asina, nos ta den bataya, e no ta facil. Pero nos ta domina e bataya. Cada dia ta bin algo acerca, y nos meta pa domina bataya, pa keda trankil den comunidad.”
Bikker a splica cu cada biaha cu desaroyo nobo acerca, nan tin bin cu otro maneho y decision pa evita fluho demasiado grandi drenta Aruba, teniendo na cuenta cu ‘nos mes ta na Aruba’.
Pa e motibo aki, a pone 10 persona cu a tuma training pa e unidad di asilo. “Nos ta haciendo lo posibel pa limitacion di nos pais, pa domina e tema aki. No ta kita afo cu cosnan por pasa, pero nos ta prepara nos mes pa cada un di nan. Trankilidad pa duna espacio na comprension di situacion. Nos no sa con largo e ta bay dura, pero ta atende pa un miho Aruba”, e mandatario a finalisa.
