Minister Bikker: ‘Si un persona bin for di otro pais, manera Colombia, eynan tambe por pidi asilo’

Minister di Husticia, Andin Bikker, a informa durante un conferencia di prensa cu ayera mainta, conseho di minister a aproba e concepto di decreto pa loke ta trata e cambio di decreto di admision riba e punto di aplicacion di asilo.

Bikker a informa cu esaki ta hopi importante pa pueblo di Aruba sa cu Gobierno ta yegando na e cambio cu awor ta formalisa e Schiphol Model, cu ta bay ta aplicabel ora un persona yega na Aruba. El a expresa cu e ley cu nan ta cambiando awor ta un ley cu no tabata actual, e tabata duna pa un persona haci uzo no debido di e proceso di asilo.

Di mesun manera, Bikker a expresa cu ayera a aproba e concepto nobo cu e Schiphol Model den dje, pa ora un persona yega Aruba cu kier haci uzo no debido di asilo, e personal por atende di manera mas rapido, e no ta drenta den e comunidad pa motibo cu e lo bay ta deteni den un tempo maximo di 28 dia, mescos cu na Hulanda, y den menos di 8 dia ya haci un evaluacion pa sa si e persona ta haci un aplicacion genuino of no.

Tocante esaki, el a sigura cu hopi biaha e biaheronan cu ta bin a resulta cu nan ta bin como refugiado economico, y nan no ta cay baho e tratado.

Tambe Bikker a declara cu na e mesun cambio di ley, nan a aproba e concepto cu si un persona ta bin for di otro pais cu por wordo delinea como ‘pais safe’ of ‘sigur’, por ehempel, si un persona ta bay Colombia of Panama, cu eynan nan tambe por pidi proteccion di asilo. Den un caso asina, no lo acepta e persona na Aruba, pa motibo cu e por a haya salvaguardia na e pais ey. Esey ta e uzo no debido cu gobierno kier contraresta.

Bikker a bisa cu desde dialuna nan ta trahando riba e maneho, cu manera un persona a yega y ta anuncia cu e ta haci uzo no debido di aplicacion di asilo, por ehempel persona cu a wordo deporta y despues a bin bek Aruba pa pidi asilo tratando di purba haci un apelacion riba e tratado pa alarga e estadia, lo contraresta esey cu e ley nobo. Nan tin e base huridico pa e persona aki por wordo declara no admisibel.

Otro dimension hopi importante riba e topico aki, Bikker a manifesta cu ta pa motibo di dimension di salubridad. Ora un persona ta drenta Aruba como turista, e mester di un prueba cu ta wordo vacuna contra cierto malesa. Cu e cambio di ley nobo, e persona lo por ta deteni te cu 28 dia pa haci un evaluacion, pa sa si e persona ta saludabel si of no, pa via cu e situacion di salud di e pais bisiña Venezuela ta deteriora y tin cierto melding cu ta señala cu tin diferente aspecto di salubridad cu mester tin na cuenta pa protege e pais.