Ayera mainta, minister di Husticia, Seguridad y Integracion, Andin Bikker a ofrece un conferencia di prensa pa trece dilanti informacion tocante un reunion informativo den cual el a participa den Parlamento. Tambe a papia di un pre-concepto di ley di ayudo cu casonan di debe.

Bikker a menciona cu el a asisti na Parlamento pa asina duna splicacion di un protocol pa reforsa frontera den cuadro di acuerdo cu Hulanda y specialmente cu Secretario di Estado pa Asuntonan Interno y Relacionnan di Reino, Raymond Knops.

El a declara cu e protocol aki ta a base di protocolnan cu a wordo cera den pasado, aproximadamente na 2004, segun loke el a sigura, y tambe na 2019, cu tin di haci cu e Rijkswet Kustwacht dirigi pa reforsa frontera y promove cooperacion.

Su meta ta “pa tuma pasonan riba tereno di vigilancia di nos frontera pa contribui na combatimento di criminalidad transnacional, door di inverti den islanan di Reino y optimalisa e cooperacion entre otro departamentonan”, Bikker a expresa.

Den esaki, tin un suma disponibel di minimo 30.5 miyon euro y e departamentonan encarga pa cu esaki ta Cuerpo di Polis Aruba, Kustwacht, IASA, Guarda Nos Costa, y Aduana, entre otro. E meta di e protocol aki ta pa entre otro inverti e suma menciona.

El a conta cu den su experiencia como parlamentario y hopi biaha como minister a cera protocolnan, pero cu algun biaha ta falta fondonan pa por materialisa e acuerdonan cu a cera. Hopi pais den parti Caribense di Reino tin retonan financiero y aworaki cu a wordo confronta cu e pandemia di Covid-19, mas cu nunca ta enfrenta cu retonan financiero.

Den acuerdo cera cu Hulanda di e Landspakket a dicidi pa modernisa e acuerdonan cu nan tin y ademas pone fondonan disponibel pa tur esey por tuma luga. “Pasobra si bo kier, por ehemplo, bin cu mas ekipo pa reforsa e frontera of mas personal, e ora ey tin fondonan cu por destina pa esaki”, Bikker a bisa.

E maneho ta keda semper resorta bao autoridadnan local, den caso aki Bikker, Ministerio Publico, departamentonan concerni, pa loke el a sigura cu esaki ta un protocol cu su persona y minister di Asuntonan Financiero, Economico y Cultura, Xiomara Maduro lo mester a cera cu Hulanda ayera mes.

“Esaki ta algo hopi beneficioso pa nos pais den e retonan cu nos ta enfrenta. Principalmente tambe mirando e situacion regional cu nos ruman pais Venezuela, e retonan cu e situacion social tin eynan y cu tin su efectonan akinan.”

Di otro banda, Bikker a comenta cu den cuadro di e pandemia, e pais tin hopi persona y famianan cu ta enfrenta reto pa loke ta trata maneho di debe. El a splica cu aworaki tin hopi famia cu ta depende riba e subsidio di salario of FASE. Algun persona a perde trabao, nan ta presenta retonan pa loke ta trata nan entrada mensual cu a bay atras substancialmente.

Esaki ta pone cu e personanan no por atende cu nan debenan, pa motibo cu nan no por a pensa cu nan lo confronta cu e pandemia sin precedente aki. Mediante un estudio cu a haci den Parlamento algun aña atras segun loke Bikker a expresa, e tempo ey e personanan tabatin masha poco reserva financiero pa atende cu cosnan cu nan no por a predeci, y na e momento ey, masha lihe nan por cay den un circulo vicioso di debe.

Pa e tempo ey den Parlamento caba, Bikker a sigura cu el a atende cu un iniciativa di ley cu ta un palet di diferente instrumento pa por yuda un persona, pareha of famia cu ta cay den un spiraal di debe, cu den dado momento nan no por atende cune mas y esey ta trece como consecuencia problemanan social, cu ta tarea di gobierno pa atende.

A informa cu nan a traha un pre-concepto di ley cu ta un ayudo pa maneha un situacion caminda cu un persona of famia a wordo haya cu demasiado debe y nan no sa con pa sali for di e situacion.

E ley aki a wordo trata na Conseho di Minister, Bikker a comenta cu ta bay bira un prioridad cu den un tempo hopi corto e por ta vigente.

Esaki tin di haci cu e trayecto di ayudo di debenan problematico cu tin dos trayecto. Un cu ta trata di mediacion, na unda e persona no ta yega Corte, cu ta traha un plan riba ambito social pa maneho di debe y asina intermedia cu institutonan financiero pa por ehemplo, refinancia e debe cu un suma mensual mas abao.

Di mesun manera intermedia pa baha e suma si tin un embargo riba salario of ta anula un contract cu por ta di huurmento di un cas. Tambe por intermedia pa consolida tur e debenan cu tin cerca diferente acreedor y eynan ta haci un suma mensual pa e persona of famia.

Di dos trayecto ta trata por ehemplo den caso cu maneha e plan di debe y intermediacion den ambito social no por yega na un acuerdo. E ora ey tin un instrumento huridico den e ley den cual ta bisa cu por haci un peticion na Corte pa por freeze e debe pa minimo seis luna. Na e momento ey e persona por hala un rosea y busca un reserva financiero pa e por sigui atende cu su debenan.

Esaki ta un ley cu pa basta aña ta trahando na Hulanda y e leynan aki ta pa usa den caso cu e persona tin debenan cu por ta incontrolabel, cu por ocasiona problemanan social y di salud. E maneho aki, Bikker a expresa cu ta bin for di Rotterdam Model, na unda na Rotterdam a introduci un maneho pa preveni y combati criminalidad.

“E debenan di e personanan aki ta bin prome cu e pandemia y nan no por a premira loke a presenta. Y esaki ta un instrumento pa nos por yuda nos comunidad cu ta pasando den dificultad pa e ora nan por tin un manera pa enfrenta nan debe,” Bikker a finalisa

Tambe a traha otro proyectonan, por ehemplo Leerorkest Aruba, cu ta dirigi pa muchanan di poco recurso pa asina den nan tempo liber nan por dedica na musica, toca un instrumento of canta, y asina yuda pa mantene nan aleha for di e mal caminda.