Minister di Husticia Andin Bikker (POR) den combersacion cu Ministerio Publico a expresa su deseo pa mehora comunicacion cu publico y prensa. Esaki el a declara diahuebs mainta durante un rueda di prensa.
Hopi biaha ora un caso grandi sosode, diferente medionan di comunicacion sa publica diferente cosnan te ora cu por ehempel Ministerio Publico bin cu un relato cu ta elimina tur duda y rumor cu a core rond. Prensa a haci e pregunta na minister Bikker di con e ministerio ta wak esaki y con lo cuminsa atende cu ne mirando cu hopi biaha informacion incorecto ta circula unda cu medionan di comunicacion hopi biaha no ta riba mesun liña cu informacion riba un tal caso.
“Den su totalidad mi a expresa e deseo cu Ministerio Publico pa nos bay mehora e comunicacion cu publico y prensa. Pues pa mantene prensa mas informa di kico ta pasando, y mi persona por ehempel a haci esaki durante di e tragedia nacional cu nos a conoce ultimo,” e minister Bikker a bisa. Durante e caso di e dos muchanan cu a fayece, dos of tres biaha pa dia e mandatario tabata duna un briefing of un conferencia di prensa pa mantene pueblo informa riba desaroyo di e caso. “Den cuadro cu e experiencia eynan mi a comunica mi deseo na Ministerio Publico. Nan ta un instancia independiente si bo wak e landsverordening op de politie den nos constitucion. Di cual ami como minister di Husticia por duna cierto recomendacion generalmente pero nan ta keda independiente.” Lo mester bay traha riba mehora comunicacion cu prensa pa evita cu speculacion ta naci y hasta medionan ta haci uzo di e vacuum eynan pa traha nan propio storia segun e mandatario. Anto esey seguramente gobierno kier mehora. Pero ta awo nan a cumpli tres siman cu nan ta den gobernacion.
No solamente pa casonan grandi
“No por soluciona e problema den un dia. Nos ta tene cuenta si cu esaki. E ta seguramente un dimension caminda mi a haci y lo sigui haci apelacion, y mi a bin cu cierto sugerencia tambe con nos lo por mehora e comunicacion cu prensa,” minister Bikker a splica.
E ta bisa cu e mehoracion di comunicacion no mester bin solamente pa ora ta trata cu casonan grandi/tragico. “Nos economia di turismo ta depende grandemente di cierto mercadonan. Ta masha facil pa purba daña reputacion di un persona y/of hasta un pais cu cierto noticianan. Pero e ta dificil pa recobra bek e reputacion eynan y specialmente ora no ta basa riba berdad.” E mandatario ta sigui splica cu ora cierto noticianan por ehempel ta sali den cuadro internacional manera e tragedia nacional di e dos criaturanan, e ora eynan Ministerio Publico mester por duna informacion real time pa evita cu cierto percepcionnan ta hiba nan propio bida, segun minister Bikker.
“Specialmente un economia di Aruba cu ta depende grandemente riba turismo, nos mester semper tin e liñanan di comunicacion habri te unda cu por. Pasobra manera nos tur sa, Ministerio Publico tin su tarea pa haci su proceso di investigacion. Dificilmente por duna tur detaye di informacion pasobra e lo stroba e investigacion,” e mandatario ta splica.
E ta haya cu mester bin un balans di te unda por informa prensa y pa na mes momento duna e investigacion e espacio pa wordo hiba na un manera independiente y sigur pa e proceso aki bay na e manera cu e berdad ta bin dilanti.
