Minister Bikker a sigura cu lo bin cu man duro; Atake contra bombero y polis ta inaceptabel

Ayera atardi, minister di Husticia, Andin Bikker, a referi na e situacion cu a surgi entre habitantenan di Village (San Nicolas) y cuerpo uniforma (polis y brandweer).

Igualmente el a bisa cu su ministerio a cuminsa concipia algun ley di emergencia pa atende cu e crisis di e coronavirus/Covid-19. Y tambe nan ta trahando riba e proceso pa repatria personanan den un status di ilegalidad cu boluntariamente kier bay su pais bek.

E mandatario a haci un apelacion civico na comunidad, specialmente den e situacion actual di shelter in place y toque de queda (TDQ) cu nos ta pasando aden pa evita cu e virus di Covid-19 por sigui plama. “E ta algo necesario. Nos no a bin cu TDQ y niun otro medida pa molestia ningun hende. Pero nos a bin cu nan pa garantisa e salubridad di nos pueblo,” minister Bikker a declara.

El a bisa cu bombero a bay duna asistencia y hendenan cu cara tapa a cuminsa ataca nan cu piedranan y diferente artefactonan, locual a ocasiona daño na nan ekipo material y principalmente a pone bida y salud di e personal di cuerpo bombero den peliger. El a cualifica esaki como “accion sin sentido.”

E cuerpo uniforma a bay duna asistencia y nan a wordo ataca pa un grupo chikito durante TDQ dialuna anochi. E mandatario tabata enfatico pa bisa cu no lo bay tolera e tipo di accion sin sentido aki. Tambe nan lo bay cu man duro den cuadro di conservacion di orden publico.

Adaptacion di leynan.
Igualmente minister Bikker a anuncia cu lo concipia leynan, manera nan a bin cu decretonan di emergencia necesario pa atende cu crisis aki. Algun di nan tin di haci cu empresanan estableci na Aruba pa nan por cumpli cu nan obligacion cu nan a adkiri, sin sa riba e magnitud di e crisis cu actualmente nos ta pasando aden.

Pa nan atende cu nan debenan y evita cu nan negoshi por cera y mas cupo di trabao por bay perdi, lo bin cu un ley di insolvencia. E mandatario a splica cu e ta un ley di insolvencia pa atende cu nan acreditado riba nan debenan, y den caso cu no tin solidaridad por bay corte.

E ley aki lo wordo inspira riba e ley di proteccion deriva di Hulanda den cuadro di Reino Hulandes. Tambe el a bisa cu na Merca e tipo di ley di insolvencia aki no ta algo nobo. Nan ta ley cu ta wordo adapta pa atende cu nan debenan y tambe e ley aki ta duna conseho pa un compania atende cu nan spiraal di debe.

Tin otro leynan cu nan ta concipiando cu tin di haci pa reuni electronicamente, entre otro pa atende reunion di conseho di Minister y diferente proceso cu awor ta bay electronico entre otro proceso hudicial, el a bisa. Minister Bikker a bisa cu lo mira e caso di Hulanda, si e ta aplicabel pa Aruba, nan lo bin cune.

Repatriacion.
Tambe minister Bikkier a informa cu e hendenan cu ta ilegal na Aruba lo wordo canalisa fondo di asistencia pa nan por bay nan pais bek.

El a bisa cu na Europa nan ta cooperando pa repatria hendenan y nos lo haya fondo di Hulanda pa yuda repatria hende cu lo desea bay nan pais bek. Segun e mandatario riba e website di DIMAS tin un info pa yena y duna informacion. Te aworaki e reaccion ta grandi di esnan cu kier haci uzo di e facilidad aki, y gobierno kier encamina esaki bon.

Mayoria di nan ta ciudadanonan di nacionalidad Venezolano. El a pidi pasenshi te ora e intercambio diplomatico entre Aruba y Venezuela por wordo concretisa pa cuminsa repatria nan. Antes nan tabata wordo manda pa Punto Fijo, pero awor e regimen di Venezuela kier centralisa e repatriacion di nan conciudadanonan via Caracas pa asina realisa nan control sanitario.