Ayera repentinamente minister di husticia, Andin Bikker a tene un reunion cu representante di Sindicato Aduanero Di Aruba (SADA) cu presencia di mediador di gobierno, Anselmo Pontilius.

E motibo di e reunion aki tabatin di haber cu e proceso di restructuracion salarial, cu pa varios aña caba e sindicato aki ta bin luchando p’e. SADA ta desea cu e proceso aki por cana hopi mas rapido, pero e realidad ta mustra cu e ta un proceso cu ainda ta tuma varios luna.

Sr. Pontilius a laga sa cu nan a haya e peticion for di SADA pa trata di haya gobierno cu su departamento di recurso humano (DRH) y departamento huridico pa yuda acelera e proceso pa introduci un structura nobo di salario. Pero debi cu minister presidente Evelyn Wever-Croes, kende ta encarga cu asunto di personal di gobierno, no ta na Aruba, Bikker kende ta encarga cu departamento di asunto huridico, a encabesa e reunion aki na bestuurskantoor.

Aunke e ta un asunto cu ta canando pa varios aña, a keda palabra na fin di aña cu e luna di april aki esaki mester a keda cla. SADA ta preocupa cu e situacion aki ta keda sigui pospone keto bay. Pero e tardansa ta debi cu e restructuracion di salario aki ta un proceso pa un grupo grandi di trahado. A base di conseho di Raad van Advies (RvA), nan mester tene cuenta tambe cu cambio di ley y su consecuencianan. Pa tal motibo, den e reunion aki minister Bikker a splica unda e proceso aki ta pega, y cual ta e motibo di esaki.

Den e reunion a keda cla cu departamento huridico tin un periodo di maximo tres siman pa bin cla cu e parti legal di e restructuracion salarial den e cuerpo uniforma aki. Pero despues cu e ta bin cerca conseho di minister bek, e mester bay cerca gabinete di gobernador.

Mediador di gobierno a propone un reunion cu minister di finansa, encarga cu departamento di duana, y tambe cu minister presidente, encarga cu departamento di personal di gobierno, pa atende cu algun detaye relaciona cu implementacion di e restructuracion di salario aki. Segun Pontilius, entre luna di mei y september, e proceso aki eventualmente lo por keda cla cu gran parti di e restructuracion aki. E ta un proceso lento, cu mester cana su caminda legal pa pais Aruba no a haya su mes cu consecuencianan despues, el a bisa na Bon Dia Aruba.