Durante un conferencia di prensa cu minister di Husticia, Andin Bikker a ofrece ayera, el a comenta cu gobierno ta desaproba e atake di partido AVP contra Ministerio Publico y ta rechasa e ponencia cu a sigura cu tabatin persecucion politico, segun partido AVP a expresa den un conferencia dianan pasa.

Bikker a señala cu el a keda hopi desapunta ora el a tende di un conferencia di prensa den cual un ex-prome minister, ex-minister di Husticia, un ex-inspector di Polis hunto cu parlamentarionan y otro personanan cu aworaki nan no ta den gobernacion sino den parlamento, a ataca Ministerio Publico y insinua cu lo tin persecucion politico.

Bikker a trece dilanti cu añanan pasa, tempo di partido AVP, tempo di Fondo di Desaroyo Nacional, nan a confronta cu varios investigacion. Segun Bikker mes a expresa, el a recorda cu Mike Eman a bisa cu nan ta bay haci un analisis profundo interno y cu nan tabata respeta institutonan hudicial. Den caso di ex-minister Paul Croes por ehempel, Bikker a comenta cu nan no a haya ningun critica contra Ministerio Publico ya cu nan a haci nan trabou independiente y a declara Croes culpabel den e proceso.

Sinembargo, aworaki cu nan ta den oposicion, Bikker a declara cu nan ta bin cu acusacionnan contra Ministerio Publico acusando cu esaki ta wordo dirigi politicamente. “Mi ta lamenta cu un ex-prome minister y un ex-minister di Husticia, cu nan supone di sa con e aparato hudicial ta funciona y independencia di Ministerio Publico, aworaki ta bin ataca instituto aki”, Bikker a declara

Tambe a expresa cu ‘ora e comunidad ta wak cu un ex-mandatario ta eigenlijk duna un señal cu nan ta sali na defensa di actonan criminal, cu ta ataca institutonan di nos pais, nan ta bin atacha e bon nomber di instituto aki’.

Di mesun manera, Bikker a sigura cu nan tin cu ofrece un disculpa den e caso aki, pa motibo cu tur e acusacion ta infunda y ta preocupante cu un partido ta reacciona di e forma ey.

Di loke ta trata situacion cu sindicato di Polis, Bikker a anuncia cu el a manda un invitacion pa un reunion ayera atardi hunto cu e sindicato, prome cu e welga tuma luga ayera y asina nan por scucha nan preocupacion, cu nan mes a indica cu kier scucha reaccion di gobierno prome cu nan a bay over riba accion menciona.

El a señala cu e tin comprension no solamente pa sindicato SPA, sino pa tur e sindicato di union cu tin un preocupacion riba e tema di indexering, pero Bikker a sigura cu nan a sinta cu otro minister den hopi reunion pa splica nan cu ta trata di un tema y un problema hereda.

E motibo ta cu gobierno anterior a redobla e debe di e pais di 48% di producto bruto nacional (GDP) y cu a yega te direccion di 90% y esey ta pone cu aworaki gobierno ta pagando 234 miyon florin na servicio di debe cu mester paga anualmente. Bikker a splica cu den un economia cu ta depende riba un unico pilar economico, cu ta turismo, e retonan ta hopi grandi y tampoco tin hopi espacio den loke ta haya di entrada pa dedica pa gastonan di personal.

“Nos mester compronde con nos a hereda e pais y kico ta e retonan cu nos tin, pero nos tin un compromiso pa maneha e pais di un manera responsabel”, Bikker a finalisa.